Reglulegar kvikmyndasýningar

Laugardaginn 18. apríl verður myndin Duggholufólkið sýnd á vegum Bíóteksins á Þingeyri.

Sýningin verður klukkan 16:00 í félagsheimili bæjarins. Ari Kristinsson leikstýrði og skrifaði handritið að Duggholufólkinu. Er þetta kvikmynd fyrir alla fjölskylduna sem kom út árið 2007 og er nútíma ævintýri byggt á samnefndri þjóðsögu sem gerðist á Vestfjörðum. Ari segir í samtali að þetta sé sennilega frumsýning myndarinnar í landshlutanum þar sem hún var ekki sýnd í Ísafjarðarbíói á sínum tíma.

Bíótekið á Þingeyri er rekið í samstarfi við Kvikmyndasafn Íslands og styrkt af Ísafjarðarbæ. Ester Bíbí Ásgeirsdóttir, verkefnastjóri hjá Kvikmyndasafninu, segir í samtali að sýningar sem þessar séu einungis mögulegar ef framtakssamir einstaklingar eru til í að taka verkefnin að sér. Tinna Ottesen og Janus Bragi Jakobsson halda utan um kvikmyndasýningarnar á Þingeyri og er aðgangur ókeypis. Þau hafa hins vegar keypt poppvél og verður nammisala á staðnum.

Til stendur að vera með kvikmyndasýningar einu sinni í mánuði á Þingeyri, rétt eins og fyrirkomulag Bíóteksins er í Reykjavík. Frumraun Bíóteksins á Þingeyri var þann 15. mars síðastliðinn þegar The Kid eftir Chaplin var sýnd fyrir fullu húsi þrátt fyrir að allar leiðir til og frá Dýrafirði væru illfærar. Þann 9. maí næstkomandi verður kvikmyndin Foxtrott sýnd.