Prjónavetri lýkur

Íslenskur prjónaiðnaður hættir aldrei að vera móðins enda hefur Listasafn Sigurjóns Ólafssonar staðið fyrir röð stuttra sýninga og viðburða í vetur - Prjónavetri - þar sem áherslan hefur verið á prjónahönnun og stöðu prjónaiðnaðar hérlendis.

Í kjölfar Hönnunarmars lýkur Prjónavetri listasafnsins, þar sem hægt er að kynna sér framleiðslu og hönnun íslensks prjónavarnings frá sl. tveimur áratugum.

Þar fléttast inn í áhrif skapandi greina og nýsköpunar auk samstarfs hönnuða og listamanna við íslenskar prjónaverksmiðjur sem framleitt hafa margar af þekktustu hönnunarvörum landsins sem margar hafa náð heimsathygli.

Markmið sýningarinnar er að gefa gestum kost á að sjá vandaðar vörur sem hafa vakið athygli og fengið verðuga viðurkenningu fyrir hönnun, útfærslu og framleiðslu – og geta lesendur Bændablaðsins náð í skottið á sýningunni sem lýkur helgina 12.–13. apríl, en opið er á milli klukkan 13–17.

Listasafn Sigurjóns er staðsett á Laugarnestanga 70 og hýsir höggmyndir og teikningar Sigurjóns Ólafssonar myndhöggvara sem lést í Reykjavík árið 1982. Auk þess að kynna list Sigurjóns býður safnið almennt upp á sýningar á verkum annarra listamanna og yfir sumartímann eru vikulega haldnir tónleikar sem hafa skipað sér fastan sess í menningarlífi Reykjavíkurborgar.