Prjónagleðin í áttunda sinn

Prjónahátíðin Prjónagleði verður haldin í áttunda sinn á Blönduósi helgina 7.-9. júní.

Svanhildur Pálsdóttir segir að hátíðin byggist sem fyrr upp á námskeiðum, fyrirlestrum og prjónatengdum viðburðum, en hún er starfsmaður Textílmiðstöðvar Íslands og Húnabyggðar sem standa fyrir hátíðinni.

„Garntorgið er svo alltaf hjarta hátíðarinnar þar sem 24 söluaðilar af öllu landinu verða með alls konar spennandi prjónatengdan varning til sölu, meðal annars íslenskt ullargarn af ýmsu tagi, bæði frá smáframleiðendum og Ístex. Á Garntorginu er einnig prjónakaffihús þar sem hægt er að njóta góðra veitinga, spjalla og prjóna. Við höfum alltaf fengið mjög góðar viðtökur í bænum og í prjónaheiminum á Íslandi – og ekkert vandamál að fá fólk til að taka þátt í þessari hátíð sem ég myndi segja að væri ein skemmtilegasta og nördalegasta bæjarhátíð landsins. Það má segja að þetta sé hálfgerð uppskeruhátíð hjá okkur, prjónafólki,“ bætir Svanhildur við og bendir á að boðið sé upp á sætaferðir bæði úr Reykjavík og frá Akureyri á hátíðina.

Meðal viðburða á hátíðinni nefnir Svanhildur prjónaheimsóknir í heimahús sem sé nýjung, þar sem nokkrir bæjarbúar bjóða heim í kaffi til að prjóna saman, samprjón í sundi, prjónamessan verður á sínum stað, prjónasýningar og bingó – auk þess sem opin hús verða hjá TextílLabi Textílmiðstöðvarinnar og Ullarþvottastöð Ístex. Þá nefnir hún sérstaklega prjónakvöldvöku í bakaríinu Krúttinu á laugardagskvöldinu.