Ótrúlegur eldri borgari
Það er mikill kraftur í honum Guðmundi Karli Guðfinnssyni, eða Mumma eins og hann er kallaður, ekki þekktur fyrir annað en að láta hendur standa fram úr ermum.
Mummi, sem átti 85 ára afmæli nýverið, býr á Flúðum og er enn í hálfu starfi hjá Hrunamannahreppi, meðal annars við að keyra út mat í hádeginu til eldri borgara á Flúðum og næsta nágrenni.
Til viðbótar vinnur hann líka ýmis störf sem til falla í áhaldahúsinu og stofnunum sveitarfélagsins.
„Samkvæmt óvísindalegri könnun, sem gerð var meðal bæjar- og sveitarstjóra landsins, teljum við næsta víst að hann Mummi okkar í áhaldahúsinu sé elsti starfsmaður sveitarfélags á Íslandi og þó að víðar væri leitað. Hann er okkur öllum góð fyrirmynd alla daga og gefur þeim sem yngri eru ekkert eftir,“ segir Aldís Hafsteinsdóttir, sveitarstjóri Hrunamannahrepps.
Samkvæmt vísindalegum rannsóknum hins vegar hefur einmitt komið fram að eðlilegast væri að afnema aldurstakmörk á vinnumarkaðnum. Að koma í veg fyrir að fólk haldi áfram vinnu er þvert á hugmyndir um lífsgæði víða í heiminum – auk þess sem þannig væri hægt að sporna mót einmanaleika og félagslegri einangrun sem gjarnan hrjáir eldri borgara.
