Nýr verkefnastjóri

Sérstakur verkefnastjóri var nýlega ráðinn til Bændasamtaka Íslands til að stýra hluta þeirra í samstarfsverkefninu Terraforming LIFE.

Verkefnið gengur út á að þróa nýja aðferð hér á Íslandi við áburðar- og lífgasframleiðslu úr lífrænum úrgangi, sem fellur til við fiskeldi á landi og í landbúnaði.

Í júní 2023 hlaut verkefnið styrk úr Umhverfis- og loftslagsáætlun Evrópusambandsins, sem samsvaraði tæpum milljarði íslenskra króna, en samstarfsaðilar Bændasamtakanna eru Landeldi hf., Orkídea, Ölfus Cluster og færeyska ráðgjafarfyrirtækið SMJ.

Nýi starfsmaðurinn heitir Gyða Pétursdóttir og mun einnig sinna öðrum verkefnum á skrifstofum Bændasamtakanna. Hún segir að Terraforming LIFE sé fyrsta íslenska verkefnið til að hljóta styrk frá Umhverfis- og loftslagsáætlun Evrópusambandsins, en það miði að því að auka sjálfbærni og að efla hringrásarhagkerfi íslensks landbúnaðar með því að nýta auðlindir betur.

„Einnig mun það draga úr kolefnisfótspori með framleiðslu á kolefnishlutlausu eldsneyti, raforku og hita. Ein af stærstu áskorunum bænda síðustu ár er hækkun áburðarverðs, og mun Terraforming LIFE vinna að því að draga úr þessum áhrifum með auknu framboði af innlendum áburði. Ég er mjög spennt að taka þátt í þessu verðuga verkefni en nú stendur yfir mikilvæg grunnvinna í undirbúningsfasanum.“

Grunnhugmyndin er, að sögn Gyðu, að ein verksmiðja þjóni svæðinu í kringum Þorlákshöfn þar sem mesta uppbygging landeldis fer fram. Næstu skref verði að prófa og greina efnasamsetningu fiskimykju og búfjárúrgangs í þeim tilgangi að ná sem bestri útkomu. „Í kjölfarið verður afurðin síðan prófuð í jarðvegi í samstarfi við bændur. Tímarammi framkvæmdanna liggur ekki enn fyrir. Terraforming LIFE er tilraunaverkefni og framhaldið ræðst af því hvernig og hvort tilraunin gengur upp,“ segir Gyða.