Ný stefna skógarbænda
Staða skógarbænda er góð að mati að mati Laufeyjar Leifsdóttur, varaformanns búgreinadeildar skógarbænda (SkógBÍ). Þess megi glögglega sjá merki í virku starfi deildarinnar, en ný stefna hennar var samþykkt á deildarfundi.
Alls voru 28 fulltrúar og gestir á fundinum auk starfsmanna. „Umræður voru uppbyggjandi og málefnalegar,“ segir Laufey Leifsdóttir en hún kynnti fjölbreytt verkefni deildarinnar síðasta árs. Hún segir fjölda tækifæra liggja í loftinu næstu misserin.
Sækja um aðild að CEPF
Ef dregið er saman í nokkur orð það helsta sem fjallað var um má nefna að ný stefna skógarbænda BÍ var samþykkt. Ætlunin er að stefnan verði í sífelldri mótun og megi og eigi að endurskoða milli deildarfunda ef þurfa þykir. Samþykkt var að deildin sækti formlega um aðild að samtökum skógarbænda í Evrópu, CEPF. Ef af líkum lætur ganga skógarbændur BÍ formlega í samtökin á vordögum og við það opnast á enn frekara samstarf við Norðurlöndin og aðrar Evrópuþjóðir. Margar tillögur fundarins snerust um stjórnsýslu og fagsvið skógræktar. Má þar helst nefna áherslu á að sveitarfélög afgreiði framkvæmdaleyfi greiðlegar til skógræktar, krafa um að gögn úr Skógarskrá Lands og skógar yrðu aðgengilegri almenningi, tillögu um leið til að greina ágreining vegna ágangsbúfjár, samræmingu tölu- og kortagagna milli stofnana ríkisins og áherslu á ræktun fjölbreytts gæðaviðar.“
Áherslumál til framtíðar
Þá var ný skýrsla Skógarbændafélagsins á Suðurlandi, „Úr skógi, skógarafurðir á Íslandi“, kynnt. „Áhyggjur af geitum inn á skógræktarlönd og kolefnismál voru einnig til umræðu. Kynnt var umfangsmikil vinna BÍ við greiningu á áherslumálum skógarbænda til framtíðar, og vakti hún mikla athygli,“ segir Laufey og vísar þar í erindi Ragnheiðar Bjarkar Halldórsdóttur.
Sú breyting varð á stjórn deildarinnar að Guðmundur Sigurðsson, fulltrúi Vesturlands, vék úr stjórn eftir þriggja ára stjórnarsetu. Í hans stað kom Rúnar Vífilsson, en hann hefur setið áður í stjórn skógarbænda, á árunum október 2019 og fram í febrúar 2022. Einnig vék Björn Bjarndal Jónsson úr sæti varamanns fyrir fulltrúa Sunnlendinga og í hans stað kom Kári Steinn Karlsson.
