Mygla kom upp í kartöflugörðunum og síðan tók við þrálát vætutíð

„Mér er alveg hætt að lítast á blikuna,“ segir Sigurbjartur Pálsson, kartöflubóndi í Skarði í Þykkvabæ. Viðvarandi rigningartíð undanfarið gerir að verkum að ekki er hægt að sinna upptökustörfum, garðar eru blautir og ekki hægt að fara um þá þó svo að einn og einn þurr dagur komi inn á milli.

Sigurbjartur segir að allt leggist á eitt og hvert áfallið á fætur öðru komið upp. Vorið var kalt og seint sett niður og lítið að gerast í görðunum fram eftir sumri.

„Þetta leit ekki vel út í sumar, tíðin var ekki hagstæð en breyttist aðeins þegar kom fram í ágúst og þá tók allt vel við sér og spretta góð. Það má segja að sú uppskera sem náðist á þeim tíma hafi verið bærileg,“ segir hann.

Mun valda einhverju tjóni

Einmitt á þeim tíma sem tíð var til friðs uppgötvaðist mygla í kartöflum á svæðinu en Sigurbjartur segir kartöflubændur reyna hvað þeir geta að verjast henni og séu ávallt í viðbragðsstöðu. Það flæki málið að um þessar mundir er búið að banna notkun lyfja sem reyndust gott vopn í baráttunni gegn myglu og þeirra í stað er boðið upp á önnur sem virka ekki eins vel.

„Við getum haldið þessu niðri og drepið mygluna með því að nota lyf og fresta upptöku á meðan þau eru að virka, við þurfum 10 daga upp í hálfan mánuð til að fá lyfin til að virka,“ segir Sigurbjartur.

Hann segir ljóst að myglan muni valda kartöflubændum í Þykkvabæ einhverju tjóni en ekki ljóst enn hversu miklu. Þegar upp kemur sýking í görðum þarf að gæta sérlega vel að því að hún nái ekki inn í húsin, þá er voðinn vís. Telur hann að það hafi tekist núna.

Lítið sem ekkert byrjað á upptöku

Þegar baráttu við myglu var lokið var eins og við manninn mælt, næsta áfall reið yfir, rigningartíðin sem veldur því að ekki er hægt að taka upp að neinu gagni.

„Þetta gengur hægt, það er mikið eftir enn þá, þannig að við erum ekki í góðri stöðu þegar komið er þetta langt fram í september. Sem betur fer hefur ekki enn komið frostnótt hér um slóðir,“ segir Sigurbjartur. Litlar breytingar séu fram undan í veðurfari, rigningartíð virðist ríkjandi áfram.