Metaðsókn að Menntaskóla Borgarfjarðar

„Við skólann eru núna 220 nemendur og þar af eru 140 nemendur í staðnámi," segir Bragi Þór Svavarsson, skólameistari Menntaskóla Borgarfjarðar aðspurður um fjölda nemenda við skólann í vetur.

„Talsverð fjölgun nemenda hefur verið síðustu ár og má alveg tengja það til þess að skólinn hefur haldið á lofti mikilli skólaþróun, sem veitt hefur verið mikil athygli en einmitt árið 2022 fékk skólinn hvatningarverðlaun íslensku menntaverðlaunanna fyrir framsækna endurskoðun á námskrá. Við alla skólaþróun hefur verið litið til þess að vera leiðandi og hugmyndir sóttar til nemenda um hvað megi bæta og fara betur við nám og kennslu," bæti Bragi Þór við.

Flestir úr Borgarfirði

Meginþorri nemenda skólans kemur úr Borgarfirði en þó hefur vaxandi fjöldi komið á svæðum sem næst liggja, má nefna Dalabyggð, Húnaþing, Akranes og Hvalfjarðarsveit. „Nemendur sem eiga lengra að geta fengið vist á nemendagörðum skólans en þangað hafa sótt fleiri en fá inni. Það er því frábær lyftistöng að í byggingu eru nýir fullkomnir nemendagarðar og verður frábært að geta boðið fleirum vist fyrir vikið," segir Bragi Þór.

Náttúrufræðibraut – búfræðisvið

Skólinn býður upp á almennt bóknám til stúdentsprófs en Bragi segir að alltaf sé nokkur fjöldi sem skráir sig á Náttúrufræðibraut – búfræðisvið. „Já, við og Landbúnaðarháskóli Íslands á Hvanneyri stöndum saman að námbraut þar sem nemendur hafa kost á að útskrifast með stúdentspróf frá MB og búfræðipróf frá LbhÍ. Náttúrufræðibraut með búfræðisviði er ætlað að veita nemendum undirbúning undir háskólanám í náttúru- og búvísindum og tekur það að jafnaði 4 ár. Nemendur taka tvö fyrstu árin (4 annir) í Menntaskóla Borgarfjarðar þar sem megináherslan er á kjarnagreinar til stúdentsprófs og valdar greinar á sviði raungreina. Í brautarkjarna er einnig lögð áhersla á samþættingu vísinda, tækni, verkfræði, lista, hagnýtrar stærðfræði og stafrænnar miðlunar. Seinni tvö árin taka nemendur við búfræðibraut Landbúnaðarháskóla Íslands á Hvanneyri. Nemendur brautskrást með stúdentspróf frá Menntaskóla Borgarfjarðar og búfræðipróf frá Landbúnaðarháskóla Íslands," segir Bragi Þór.