„Fjall er merkileg eign“
Orðsins list kemur að þessu sinni frá Þorsteini frá Hamri.
Þorsteinn (Jónsson) frá Hamri var fæddur 15. mars 1938 að Hamri í Þverárhlíð í Borgarfirði. Hann lauk gagnfræðaprófi og landsprófi frá Reykholtsskóla 1954 og stundaði síðan nám í Kennaraskóla Íslands 1955 til 1957. Þorsteinn vann sem aðstoðarbókavörður á Bókasafni Kópavogs frá 1961 til ársins 1967, en frá þeim tíma hafði hann ritstörf að aðalstarfi. Þorsteinn vann jafnframt að gerð útvarpsþátta, prófarkalestri og þýðingum.
Fyrsta ljóðabók Þorsteins, Í svörtum kufli, kom út árið 1958. Þorsteinn var afkastamikið ljóðskáld en ritaði einnig skáldsögur og þætti. Fyrsta skáldsaga hans, Himinbjargarsaga eða Skógardraumur, ævintýri kom út 1969. Hann var einnig ötull þýðandi og þýddi m.a. fjölmargar barnabækur. Hann lést árið 2018.
Þorsteinn hlaut fjölda viðurkenninga fyrir ritstörf sín, meðal þeirra má nefna Íslensku bókmenntaverðlaunin árið 1992 fyrir ljóðabókina Sæfarinn sofandi, riddarakross hinnar íslensku fálkaorðu fyrir ritstörf árið 1996, heiðurslaun Alþingis árið 2001 og verðlaun Jónasar Hallgrímssonar á degi íslenskrar tungu árið 2009. Þorsteinn var gerður að heiðursfélaga Rithöfundasambandsins árið 2006.
... Þó hefur margur maðurinn eignazt sína friðarvin hér lengra upp um óbyggðina. Bændur hafa löngum minnzt hljóðlátra stunda við heiðavötnin, og þess eru dæmi að menn hafi legið þar við dorg við köld kjör einir, horfið þangað síðan á efri árum og trúlega dáið í heiðina að lyktum. Hvítsíðungar áttu fyrrum seljaland gott á Kjarradal, og þótt mörgu hafi verið logið um seljasælu voru þar sumargrið, stundarhlé á hinni venjubundnu vinnuþrælkun heima fyrir. ...
Möttull konungur eða Caterpillar, úr kaflanum Staðir norðan Strúts; Brunnur. 1974. Ritsafn, Iðunn, 1998.
Fjall
Fjall sem þú ert að skoða og fást við hefur margar hliðar og fleti; þú gengur umhverfis það, klífur það og kannar hvert drag, hvern dýjakrók, hverja skriðu, einkum með tilliti til greiðfærra leiða. Þó er fremur ólíklegt að þú bindir mesta tryggð við þá staði þar sem uppgangan er auðveldust og ferðalangar leita helzt útsýnis. Því fjall er merkileg eign: þegar alls er gætt sérðu fjall einungis frá þeirri ógleymanlegu hlið sem þér var gefið það.
Fiðrið úr sæng Daladrottningar, 1977. Ritsafn, Iðunn, 1998.
Mörg eru ljóðin
Mörg eru ljóðin glaðbeitt og græn
ofsareið og eldrauð
blá eins og heiðríkjan
brún eins og lyng haustsins
og koma inn til manna auðmjúk
eða krefjandi.
Vera má að önnur ljóð segi öllu færra;
sum koma sjóvot
og sumum fer eins og
beitarhúsmanni
sem barizt hefur alla nóttina við
staðardrauginn:
það líður yfir þau í ljósinu.
Fiðrið úr sæng Daladrottningar, 1977. Ritsafn, Iðunn, 1998.
