Litla hryllingsbúðin
Nú hefur eitt elsta áhugamannaleikfélag á landinu, Leikfélag Sauðárkróks, ákveðið að setja upp söngleikinn sívinsæla, Litlu hryllingsbúðina.
Leikfélagið, sem var stofnað þann 13. apríl 1888, hefur yfir árin haldið nokkuð góðum velli, frumflutt sýningar af öllu tagi og helst tvær árlega. Samkvæmt hefð, í kringum Sæluviku Skagfirðinga að vori og svo aðra, helst barnasýningu að haustlagi.
Fjallar Litla hryllingsbúðin um uppburðarlítinn ungan mann að nafni Baldur og hana Auði, en saman vinna þau í blómabúð. Auður á reyndar kærasta, tannlækni nokkurn sem nýtur þess bæði að klæðast leðri og beita hana ofbeldi. Kannast margir við lagið „Þú verður tannlæknir“, þar sem hann syngur um sadískt eðli sitt – og eins og þeir sem þekkja söguna vita, endar sá í kjafti mannætublóms. Það syngur einmitt fullum hálsi annað þekkt lag, „Gemmér“, en blómið keypti Baldur með það fyrir augum að selja í búðinni. Kemur fljótt í ljós að þessi annars sakleysislega jurt hefur þann eiginleika að geta talað auk þess sem hún nærist helst á fersku mannakjöti Baldri til mikils ama. Kraftur, gleði og glaumur einkenna sýninguna, en leikstjóri er Valgeir Skagfjörð. Frumsýning verður þann 28. apríl nk. og hægt er að panta hjá tix.is. Eins og er eru komnar sex sýningar í sölu en þær næstu verða dagana 29. apríl, svo 1., 3., 5. og 8. maí kl. 20.
