Meistarataktar

Einn besti spilari landsins, Júlíus Sigurjónsson, sýndi takta í sumarbridge nýverið og skildi andstöðuna eftir með sárt ennið.

Vestur gefur – allir á hættu:

Samingurinn er 4 spaðar og austur var fremur snöggur til að spila út tígli. Júlíus drap heima og renndi spaðadrottningunni á borðið. Austur dúkkaði fumlaust. Nú var komið að stórri ákvörðun. Var austur vel með á nótunum með því að dúkka eða átti vestur kónginn? Eftir langa umhugsun stakk Júlíus upp ásnum og verðlaunin voru mikil þegar kóngur blankur birtist. Eftir það voru 11 slagir í húsi en athugið hvað gerist eftir að drottningin fær að rúlla í trompi. Þá getur vestur gefið austri tvær tígulstungur. Vörnin fær 4 slagi og banar geiminu.

Ef austur á tvö tromp en kóngur liggur þriðji hjá vestri drepur ás og meiri spaði líka frekari stungur. En skorið var ansi gott – og þurfti að hafa fyrir því. Einkum í tvímenningi. Júlíus er í hópi spilara sem hafa haft atvinnu af bridds utan landsteinanna og sýndi í þessu spili hvers vegna.

Línur að skýrast í bikarkeppninni

Ein af stórviðureignum 2. umferðar í bikarkeppni Bridgesambands Íslands er nokkuð á veg komin. Sveit Frímanns vann góðan sigur á Grant Thornton á Akureyri og verður birt spil úr leiknum í næsta briddsþætti Bændablaðsins.

Grant Thornton var fyrir fram ein sigurstranglegasta sveitin en InfoCapital er líklegur sigurvegari, næsta viðureign þeirrar stórsveitar er við sveit Kjöríss og fer leikurinn sennilega fram 11. ágúst.

Fín þátttaka í sumarbridge

Góð mæting hefur verið í sumarbridge í Síðumúlanum í sumar og gaman að sjá fjölda nýrra spilara. Nýliðar mega hafa með sér kerfiskort og kalla til keppnisstjóra til ráðgjafar ef upp koma spurningar. Eldri og reyndari spilarar eru nánast án undantekninga þolinmóðir og skilningsríkir. Þannig viljum við hafa það. Bridds fyrir alla!