Meiri skógrækt –betra loftslag

Segja má að loftslagsmál hafi verið í brennidepli undanfarnar vikur, allt frá því að loftslagsnefnd Sameinuðu þjóðanna birti ógnvænlega ­skýrslu um stöðu þessara mála. Píratar hafa um árabil haft mjög metnaðarfulla stefnu í loftslagsmálum, enda hlaut hún hæstu einkunn Ungra umhverfissinna nýverið. Í stefnunni segir m.a.:

Loftslagsmálin eru án efa eitt af stærstu viðfangsefnum samtímans. Við Píratar erum tilbúin í þær aðgerðir sem þarf að ráðast í til að byggja upp græna og sjálfbæra framtíð. Á sama tíma vitum við að fram undan eru óumflýjanlegar umbreytingar á veröld okkar sem Íslendingar, eins og heimsbyggðin öll, þurfa að búa sig undir. Við sjáum fyrir okkur samfélag og lífríki sem blómstrar þrátt fyrir þau risavöxnu verkefni sem glíma þarf við.

Kolefnishlutleysi er lykilþáttur í að leiðrétta loftslagsógnina. Við viljum ná því með því að byggja upp græna og sjálfbæra framtíð, sem krefst opinberra fjárfestinga með tilheyrandi tækifærum til nýsköpunar og atvinnuþróunar. Við viljum búa til skattalega hvata fyrir atvinnulífið til að grænvæðast, styrkja græna sprota, koma í veg fyrir stuðning við mengandi stóriðju, meta allar aðgerðir ríkisins og útgjöld þess út frá umhverfis- og loftslagsmálum, svo fátt eitt sé nefnt.Á þessum vettvangi langar okkur til að benda á eina leið í átt að kolefnishlutleysi sem jafnframt er hluti af stefnu Pírata en hefur ekki fengið mikið rúm í opinberri umræðu, en það er stóraukin skógrækt. Tré losa koltvísýring úr andrúmsloftinu og binda hann í vefjum sínum og í jarðveginum en skila súrefnishluta CO2 sameindarinnar aftur út í andrúmsloftið.

Skoðum nokkur gildi fyrir einn hektara skógar: Plöntun og girðing kostar um 500.000 kr. Binding kolefnis er 7-8 tonn á ári að meðaltali yfir landið. Uppskera gæti orðið 7 tonn á ári ef miðað er við 60 ára vaxtarlotu. Ágóðinn af uppbyggingu þessarar auðlindar er í raun margþættur: Hún bindur kolefni, gefur af sér afurð, skapar vinnu og – síðast en ekki síst – er til mikillar prýði.

Skóg- og kjarrlendi landsins, sem nú þegar er til staðar, geymir 37% þess kolefnis sem bundið er í lífmassa landsins en þekur einungis 1,9% landsins. Nú er lag að ráðast í stórátak í nýskógrækt, með því verður stigið eitt skref – af mörgum – í átt til kolefnishlutleysis, í átt að betra loftslagi fyrir komandi kynslóðir.

Einar Brynjólfsson
& Skúli Björnsson

Einar og Skúli skipa 1.
og 5. sæti á lista Pírata