Matreiðslunemendur og garðyrkjubændur

Nýlega fóru 30 matreiðslunemendur við Menntaskólann í Kópavogi (MK) og tveir kennarar þeirra í skemmtilega heimsókn til nokkurra garðyrkjubænda í Uppsveitum Árnessýslu.

Sölufélag garðyrkjumanna skipulagði ferðina en í henni fengu nemendur að upplifa ferskleika íslenska grænmetisins frá fyrstu hendi. Ragnheiður og Friðrik á garðyrkjustöðinni Flúðajörfa tóku hópinn út á akrana þar sem þau fengu að uppskera brakandi ferskar gulrætur, blóm- og spergilkál við mikla hrifningu.

Flúðasveppir og Friðheimar

Ævar tók á móti hópnum í Flúðasveppum og kynnti allt svepparæktunarferlið, sem nemendum þótti mjög fróðlegt. Nemendur fengu sér síðan ljúffenga sveppasúpu ásamt ljúffengu meðlæti á Farmers Bistro hjá Flúðasveppum.

Knútur Ármann á Friðheimum í Reykholti leiddi þau um gróðurhúsin, sagði frá allri þeirra starfsemi og sýndi þeim inn í eldhúsið og kynnti einnig Vínstofu Friðheima.

Kryddtegundir Ártanga

Hópurinn kom einnig við á garðyrkjustöðinni Kinn í Hveragerði og Ártangi í Grímsnesi var líka heimsóttur þar sem kynntar voru þær fjölmörgu kryddtegundir, sem ræktaðar eru í garðyrkjustöðinni.

„Það er mikill heiður fyrir Sölufélagið og garðyrkjubændur að fá tækifæri til að fræða kokkanema um eiginleika og gæði íslenska grænmetisins. Okkur er það mikilvægt að nemendur fái að kynnast ræktuninni frá fyrstu hendi, smakka grænmetið beint úr gróðurhúsunum og akrinum og geta fengið að spyrja spurninga sem brennur á þeim að fá svör við. Samstarfið við MK hefur staðið í nokkur ár og höfum við farið tvær ferðir á ári, eina að vori og svo hina að hausti. Nemendur eru ákaflega áhugasamir og er sú upplifun og fróðleikur sem þau fá úr ferðinni tvinnuð saman við námsefnið,“ segir Kristín Linda Sveinsdóttir, markaðsstjóri Sölufélagsins.