Mata fær langmest af kjötkvóta

Búið er að úthluta tollkvótum fyrir landbúnaðarvörur frá Evrópusambandinu fyrir tímabilið 1. janúar 2026 til 30. júní 2026 og fær Mata langmest af kvótanum fyrir óunnar kjötvörur, eða rúm 300 tonn. Næstmest fær Háihólmi, rúm 168 tonn, og síðan LL42 sem fær rúm 157 tonn.

Mata fær mest af svína- og alifuglakjöti. Á vef fyrirtækisins Mata er starfsemin sögð felast í sölu og dreifingu ávaxta og grænmetis til verslana, veitingastaða og mötuneyta á Íslandi. Þar segir að það sé dótturfyrirtæki Langasjávar, en systurfélögin séu Matfugl, sem sé einn stærsti framleiðandi kjúklingaafurða á Íslandi, Síld og fiskur, sem sé einnig þekktasti framleiðandi á kjötáleggi og grísakjöti undir merkjum Ali, og Salathúsið sem framleiði salattegundir. Í fyrirtækjaskrá eru Guðný Edda Gísladóttir, Eggert Árni Gíslason og Halldór Páll Gíslason skráðir eigendur Mata.

Háihólmi fær úr öllum kjötflokkum

Háihólmi fær umtalsvert magn kjötkvóta í öllum þremur kjöttegundunum. Í fyrirtækjaskrá er Birgir Karl Ólafsson skráður forráðamaður og eigandi með 100% eignarhlut.

Fyrirtækinu LL42 er úthlutað kvótum í svína- og alifuglakjöti. Í fyrirtækjaskrá er Geir Gunnar Geirsson skráður forráðamaður og eigandi með 50% eignarhlut en hann er einnig forstjóri Stjörnugríss.Nathan & Olsen fær rúmlega 140 tonn af nauta- og alifuglakjöti. Björg Fenger er skráður stjórnarformaður Nathan í fyrirtækjaskrá og annar eigenda ásamt Ara Fenger.

Útboðsgjald 760 krónur fyrir nautakjöt

Útboðsgjald tollkvóta ræðst af lægsta samþykkta tilboði í hverjum vörulið, sem telst þá til jafnvægisverðs.

Fyrir kíló af nautakjöti reiknast jafnvægisverðið 760 krónur, 380 krónur á hvert kíló af svínakjöti, 620 krónur á kíló alifuglakjöts og 460 krónur fyrir kílóið af alifuglakjöti í flokknum lífrænt ræktað/lausagöngu.