Losun gróðurhúsalofttegunda frá landbúnaði jókst

Hagstofa Íslands hefur birt bráðabirgðaniðurstöður sínar um losun gróðurhúsalofttegunda frá íslenska hagkerfinu fyrir síðasta ár, þar sem heildarniðurstaðan er sú að samdráttur mælist um fimm prósent á milli ára. Aukning er hins vegar á losun frá þeim hluta losunarbókhaldsins sem landbúnaður tilheyrir, sem nemur um tveimur prósentum.

Bókhald Hagstofunnar um losun frá hagkerfi Íslands snýr að losun frá íslenskum fyrirtækjum og einstaklingum, hvar sem þeir eru í heiminum.

Losun á metani og hláturgasi eykst

Undir losunarflokki Hagstofunnar sem heitir „A- Landbúnaður, skógrækt og fiskveiðar“, er sérstakur undirflokkur fyrir ræktun nytjajurta og búfjárrækt. Þar sést að um tveggja prósenta aukning er í losun á koltvísýringsígildum – sem nær yfir allar gróðurhúsalofttegundir sem losna úr þessum flokki. Losun á koltvísýringi dregst þó nokkuð saman en losun á bæði metani og hláturgasi eykst nokkuð.

Í grein á Vísi árið 2023 var munurinn á þessum tveimur bókhaldskerfum útskýrður af sérfræðingum Umhverfisstofnunar, Hagstofunnar og Landgræðslunnar. Þar segir að tilgangur bókhaldskerfis Hagstofunnar sé að meta losun út frá atvinnugreinum í hlutfalli við fjölda starfsfólks, veltu og skattagreiðslur atvinnugreina. 

Umhverfis- og orkustofnun heldur utan um annars konar loftslagsbókhald sem þó skarast að vissu leyti við bókhald Hagstofunnar og eru grunngögn fyrir þá vinnu. Það inniheldur hins vegar losun og bindingu vegna landnotkunar og skógræktar á Íslandi, sem ekki er tekið inn hjá Hagstofunni.

Landsskýrslur UOS

Niðurstöður losunarbókhalds Umhverfis- og orkustofnunar eru settar fram árlega í Landsskýrslu um losun gróðurhúsalofttegunda (National Inventory Report) sem falla undir rammasamning Sameinuðu þjóðanna um loftslagsbreytingar (UNFCCC). Öll aðildarríki þessa samnings skila inn slíku bókhaldi. Bókhaldið er síðan forsenda uppgjörs skuldbindinganna sem Ísland hefur gagnvart Evrópusambandinu og Sameinuðu þjóðunum vegna Parísarsamningsins.

Ríki sem tilheyra Evrópska efnahagssvæðinu skila bókhaldi um losun frá hagkerfi (Air Emission Accounts) til Hagstofu Evrópusambandsins (Eurostat).

Þessu bókhaldi fylgja engar beinar alþjóðlegar skuldbindingar en Evrópuþingið hefur nýtt þessa reikninga til grundvallar lagasetningar þar sem reikningarnir tengjast öðrum efnahagsreikningum, svo sem landsframleiðslu og atvinnutölfræði.