Listaverk úr íslensku byggi

Listamaðurinn og hönnuðurinn Hanna Dís Whitehead undirbýr sýningu í HAKK gallery. Efniviður listaverkanna eru strá úr kornrækt í Hornafirði.

Hanna Dís segir í samtali að hún noti aðferð sem nefnist strálagning, eða straw marquetry á ensku, sem á uppruna sinn frá Asíu en barst til Evrópu á 17. öld. Stráin séu þurrkuð og klippt niður milli hnjáa og þá sé hægt að kljúfa þau og fletja út.

„Verkin sem verða til sýnis í HAKK gallery eru með alls konar strálögðum geometrískum mynstrum,“ segir Hanna Dís. „Ég strálegg á þriggja millimetra krossvið sem ég lasersker síðan í form sem ég raða saman. Þannig fæ ég mjög nákvæman skurð.“ Hún bætir við að þessi aðferð einskorðist ekki við listaverk sem hengd eru á vegg, heldur sé líka hægt að skreyta nytjahluti, húsgögn, skápa og borð með strálagningu.

Aðspurð af hverju hún ákvað að leggja fyrir sig strálagningu segir Hanna að hún hafi viljað nýta betur þann efnivið sem er úr nærumhverfinu. Hún er búsett í Akurnesi í Hornafirði þar sem allt í kring er stunduð kornrækt. „Síðustu ár hef ég fengið bygg í Flatey á Mýrum,“ segir Hanna Dís. Hún getur ekki nýtt hráefnið eftir að það hefur farið í gegnum þreskivélarnar og því þarf hún að klippa kornið sjálf með höndum. Hvert strá gefur af sér talsvert yfirborð og því þarf hún ekki mjög mikla uppskeru.

Sýningaropnun verður í HAKK gallery við Óðinsgötu klukkan 18:00 föstudaginn 30. janúar.