Vinningsleið í vondri legu

Þeir voru nokkuð niðurlútir sumir AVspilararnir sem fóru niður á 6 gröndum í spili 17 í 6. umferð. 33 hápunktar og fimmlitur! Nokkrir þóttust óheppnir og nefndu að laufkóngurinn hefði ekki legið fyrir svíningu, hjartað brotnaði ekki 3-3 og lífliturinn tígull, hefði brotnað 4-1. Allt rétt. En samt var leið.

Norður gefur, enginn á hættu. Sagnir voru stuttar og laggóðar við borð umsjónarmanns. Austur opnaði á 14-16 punkta grandi og vetur meldaði sex grönd. 

Út kom spaðatía, sem sagnhafi drap á ás í blindum og sá gosann birtast. Sagnhafi tók tvo efstu í tígli, sá leguna, spilaði litlum tígli, norður drap á gosa og skipti yfir í lítið lauf. Sagnhafi drap á ás og suður setti lítið sem gat verið kall. Nú tók sagnhafi alla tíglana, svo spaðana og þegar hjartað lá eins og það lá, fór spilið einn niður. Í samanburðinum voru spámenn snöggir að benda austri á að ef sagnhafi tímasetur spil sitt með öðrum hætti en hann gerði og tekur hjörtun áður en hann spilar tíglum til enda lendir suður í kastþröng í svörtu litunum.

Sumarbridds farið af stað

Spilað verður í Síðumúlanum, höfuðstöðvum Bridgesambands Íslands, alla mánudaga og miðvikudaga í sumar og eru nýir spilarar ekki síst hvattir til að mæta. Vel er tekið á móti nýliðum og spilurum sem ekki búa yfir mikilli þátttöku. Jafnvel er möguleiki á að redda makker ef fólk mætir stakt, gott væri að láta vita af því með fyrirvara, t.d. á Bridgespjallinu.

Umsjón: Björn Þorláksson

bjornthorlaksson[hjá]gmail.com