23 slagir í einu spili
Undankeppni Íslandsmótsins fór fram á dögunum í Fjölbrautaskólanum í Ármúla og vann Infocapital mótið með fáheyrðum yfirburðum. 28 sveitir víða af landinu börðust um 12 sæti í úrslitum.
Í öðru sæti endaði sveit Doktorsins og í þriðja sæti var sveit Karls Sigurhjartarsonar. Fjórar landsbyggðasveitir komust í úrslit sem hlýtur að vera lesendum Bændablaðsins ánægjuefni.
Spilaðar voru 12 umferðir eftir Monrad kerfi og tókst mótið vel í hvívetna undir styrkri leiðsögn Matthíasar Imsland, framkvæmdastjóra Bridgesambands Íslands.
Í spili dagsins úr mótinu gekk mikið á. Fimm pör fengu að spila 5 spaða doblaða og unnu sinn samning án vandkvæða. Fjögur pör melduðu 6 spaða yfir 6 tíglum og gáfu aðeins út 100 eftir dobl sem er lítið þegar hálfslemma í hina áttina á hættunni er í boði. 13 pör fengu 3 eða 4 grönd með sterku spilin. 9 pör spiluðu draumasamninginn, 6 tígla, sem gaf 407 stig í butler. Eitt par meldaði 6 grönd yfir 6 spaða fórn andstæðinganna og fékk úr hjartaás sem gaf spilið!
Þeir sem nota Tartan eða sagnvenju sem Íslendingar kalla Jón og Símon, þar sem hálitarsögn lofar einnig láglit, voru með forskot. Þar sem suður gat vakið á 2 spöðum fór alla jafna vel hjá NS.
19 impar runnu til í þessu eina spili í einni viðureigninni milli SFG og Akureyrar- apóteks. 1370 plús 650 – ekki á hverjum degi sem spilaguðirnir útdeila hendi þar sem 11 slagir eru í aðra áttina og 12 í hina!
Sagnir þar sem Gunnlaugur Karlsson, Kjartan Ingvarsson sátu NS voru þannig að Gunnlaugur opnaði á tveimur spöðum, dobl, 4 spaðar hjá Kjartani. Eftir annað dobl vesturs meldaði Kjartan 5 spaða og eftir einn eitt doblið dóu sagnir út.
Umsjón: Björn Þorláksson
bjornthorlaksson[hjá]gmail.com
