Kattliðugir knapar

Styrkur og einbeiting skein úr augum nokkurra barnungra knapa á æskulýðssýningu hestamannafélagsins Geysis á dögunum. Þau sýndu þar afrakstur æfinga vetrarins í hestafimleikum, en þessi áhugaverða íþrótt nýtur vaxandi hylli hér á landi.

Í vetur hafa yfir fjörutíu börn sótt námskeið í hestafimleikum hjá hestamannafélaginu Geysi á Hellu. Reiðkennarinn Jónína Lilja Pálmadóttir hefur umsjón með námskeiðinu en hún kynntist sportinu í heimahögunum í Húnavatnssýslu hjá hestamannafélaginu Þyt fyrir nokkrum árum.

„Kathrin Schmitt er frumkvöðullinn hér á landi en hún æfði hestafimleika í Þýskalandi þegar hún var yngri og kynnti þetta hér og hefur verið með námskeið hjá Þyt í yfir fimmtán ár,“ segir Jónína Lilja. Hún var Kathrinu til aðstoðar í tvö ár áður en hún flutti á Hellu og flutti þá þekkinguna með sér á Suðurlandið. „Þetta er þrælsniðug íþrótt sem eflir jafnvægið mikið og þjálfar bæði styrk, þol og teygjanleika. Ég finn það á dóttur minni sem hefur æft í tvö ár. Þegar hún er komin í hnakkinn á hestbaki þá haggar henni ekkert,“ segir Jónína.

Hestafimleikar eru, eins og nafnið bendir til, fimleikar á hestbaki. Hesturinn fer um á feti eða brokki á meðan knaparnir sýna fimleikalistir á baki hestsins sem búinn er sérstakri dýnu og gjörð með handföngum.

Jónína segir hestafimleika sniðugt fyrsta skref í reiðmennsku enda þurfi þátttakendur hvorki að eiga hest né hafa bakgrunn í hestamennsku eða fimleikum. „Við leggjum mikið upp úr umönnun hestanna svo allir fá að upplifa nándina við dýrið. Sumir hafa aldrei komið nálægt hesti áður og læra þannig almenna umhirðu. Íþróttin eflir liðsanda þótt hún sé mjög einstaklingsmiðuð. Þá er engin aldurs- eða kynjaskipting,“ segir hún en börnin sem æfðu hjá henni í vetur voru á aldrinum 3–13 ára.

„Hugtökin sem við vinnum með er agi, traust og samvinna. Þá þurfa krakkarnir að búa yfir sjálfstrausti til að vaða í að sýna fimleikaæfingar á hesti sem hreyfir sig,“ segir Jónína. Á sýningunni mátti meðal annars sjá börn standa á höndum á hestbaki og knapa vinna saman í hinum ýmsu stöðum sem kallaði á mikið traust til hvort annars.

Erlendis eru hestafimleikar stundaðir sem keppnisform og telst ein af tíu hestaíþróttagreinum sem eru viðurkenndar af Alþjóðahestaíþróttasambandinu (FEI). Jónína telur hestafimleika vera góða viðbót við íslenska hestamennsku. „Íslenski hesturinn hentar vel fyrir þessa íþrótt, enda eru þeir með gott geðslag. Íþróttin eflir jafnvægið gríðarlega og það skiptir gífurlegu máli. Þá virðast börnin hafa rosalega gaman af þessu,“ segir Jónína.