Kassabílarallí á Akranesi

Síðustu helgina í ágúst verður keppt í kassabílarallíi á Akranesi í fyrsta skiptið. Dagurinn verður tileinkaður kassabílum og kassabílasmíði þar sem keppt verður í nokkrum þrautum og að sjálfsögðu verða veitt verðlaun fyrir flottasta eða frumlegasta bílinn. Allir eru að sjálfsögðu velkomnir að taka þátt hvar sem þeir eiga heima á landinu og ekkert kostar að vera með en væntanlegir þátttakendur eru beðnir að skrá sig fyrirfram í gegnum netfangið; kassabilarally@gmail.com. Þau sem standa að deginum eru húsasmiðirnir Ole Jakob Volden, Helgi Björn Hjaltested og Andrea Magnúsdóttir.