Játar innbrot í eldisbú

Karlmaður á þrítugsaldri var handtekinn og hefur hann játað á sig innbrot og eignaspjöll í húsnæði Stjörnugríss á Kjalarnesi, Reykjabúsins í Mosfellsbæ og í önnur bú á Suðurlandi og Kjalarnesi. Maðurinn er talinn hafa verið einn að verki.

Vísbendingar sem bárust lögreglunni á höfuðborgarsvæðinu leiddu til þess að rannsókn hófst á manninum. Verður hann ákærður fyrir innbrot og eignarspjöll. Hjördís Sigurbjartsdóttir aðstoðaryfirlögregluþjónn segir í samtali við blaðið að maðurinn hafi játað á sig innbrot í fleiri bú sem ekki voru tilkynnt til lögreglu, þar á meðal innbrot í kjúklingabúið Móa á Kjalarnesi og svo á fleiri staði í eigu Stjörnugríss. Maðurinn er talinn hafa verið einn að verki þar sem hann sést einn á ferð í þeim uppökum sem lögreglan hefur undir höndum og segist sjálfur auk þess hafa starfað einn.

Brotist var inn í svínabú Stjörnugríss í tvígang og í Reykjabúið í Mosfellsbæ í sumar. Bændur hafa verið uggandi yfir innbrotahrinunni og lögreglan hefur kvatt eldisbú til að huga að öryggisráðstöfunum. Að sögn Hjördísar sýna viðburðir sumarsins okkur að mögulega þurfi að hafa aukið eftirlit með búum og sé það samtal sem lögreglan sé einnig að eiga við Matvælastofnun.

Einnig var brotist inn í minkabúið Dalsbú í Mosfellsdal í sumar en maðurinn liggur að svo stöddu ekki undir grun í því máli. Í tilkynningu lögreglunnar segir að innbrotið í minkabúið sé enn til rannsóknar og miði vel en að ekki sé hægt að veita frekari upplýsingar um það að svo stöddu.