Íslenskur hestur fer til Afríku

Í mars á þessu ári verður fyrsta íslenska hestinum flogið til Tansaníu. Ekki er vitað til þess að hestur af íslensku kyni hafi áður farið til Afríku.

Vera Weber býr í Sviss og stundar þar hestamennsku. Síðasta sumar fékk hún í heimsókn til sín konu að nafni Saskia Rechsteiner sem féll algjörlega fyrir íslenska hestinum. Saskia býr ásamt fjölskyldu sinni í Tansaníu, í þjóðgarði mjög nærri Kilimanjaro, og er þar með stóran búgarð í um 800 m hæð yfir sjávarmáli. Saskia hafði mikinn áhuga á að fá að kaupa íslenska hesta og flytja þá til Tansaníu eftir að hafa prófað þá hjá Veru.

„Ég var örlítið skeptísk á það í upphafi, en ég þekkti ekki aðstæður þar í landi og var því óviss um hvort þær hentuðu íslenskum hestum. Saskia bauð mér til Tansaníu þar sem ég dvaldi í mánuð og eftir það varð ég fullviss um að íslenski hesturinn gæti vel þrifist á þessum framandi slóðum. Saskia og fjölskylda hennar eru nú þegar með hesta af öðrum kynjum og bjóða meðal annars upp á útreiðartúra fyrir ferðamenn í mjög fallegu landslagi,“ segir Vera en markmiðið er að flytja einn gelding til þeirra í mars á þessu ári.

Þá er vetur í Tansaníu og hitastigið í kringum fimmtán gráður en Vera telur það vera heppilegar aðstæður fyrir íslenskan hest. Ef allt gengur vel er stefnan að flytja fleiri íslensk hross til Tansaníu.

Samkvæmt Worldfeng, upprunaættbók íslenska hestsins, eru rúmlega 300.000 íslensk hross skráð í yfir tuttugu löndum heimsins í þremur heimsálfum. Sú fjórða bætist nú við.