Hugmyndir um búseturúrræði til sveita fyrir eldri borgara ræddar
Undirbúningsfundur samtaka um ný búsetuúrræði til sveita fyrir eldri borgara verður haldinn næstkomandi þriðjudag á Café Catalina í Hamraborg í Kópavogi og hefst fundurinn klukkan 14.
Á fundinum verða kynntar hugmyndir um stofnun sambýliseininga aldraðra í búsetukjörnum utan þéttbýlis. Bændablaðið fjallaði um þessar hugmyndir í fyrsta tölublaði þessa árs og ræddi við Árna Gunnarsson, fyrrverandi bónda í Skagafirði og núverandi eldri borgara, sem telja má sem upphafsmann þeirra.
Sólheimar fyrirmynd
Árni sagði að Sólheimar í Grímsnesi væru að vissu leyti fyrirmynd. Ríkið gæti lagt til jarðir í þessi verkefni og það gætu verið eftir atvikum litlar eða stórar jarðir með húsnæði fyrir sjö til tíu einstaklinga. Það sé margt fólk einmana sem gæti vel hugsað sér að búa á stað þar sem hægt væri að hugsa um hesta, hunda, hænsni – og það gæti líka stundað garðyrkju.
Eldra fólk hafi í mörgum tilvikum tengsl út í sveitirnar og hafi áhuga á að endurnýja kynnin við sveitalífið; fólk með ágæta hreyfigetu og kollinn í lagi.
Sjá umfjöllunina í heild sinni hér:
Reynsla annarra þjóða
Að sögn Árna verður á fundinum stutt kynning á reynslu annarra þjóða á búsetukjörnum með blönduðum aldurshópum utan þéttbýlis.
Kannaður verður áhugi á ofanrituðum valkostum og málin rædd á breiðum grundvelli.
Þá er gert ráð fyrir að á fundinum verði formlega gengið frá stofnun þessa áhugahóps og kosin stjórn.
