Grunur um salmonellu í spænsku svínakjöti

Höfundur: Bjarni Rúnars

Matvælastofnun hefur sent frá sér viðvörun vegna gruns um salmonellusmit í Lúxus grísakótelettum frá Krónunni. Salmonella greindist í einu sýni og hefur Krónan ákveðið að bregðast við því og innkalla Lúxus grísakótelettur, bæði ókryddaðar og kryddaðar. Er það gert í samráði við Heilbrigðiseftirlit Reykjavíkur.

Í tilkynningu frá Matvælastofnun kemur fram að eftirfarandi auðkenni sé á vörunni:

Vörumerki: Krónan

Vöruheiti: Lúxus grísakótelettur úrb., Lúxus grísakótelettur ítölsk marinering, Lúxus grísakótelettur New York

Síðasti notkunardagur: Allar dagsetningar

Geymsluskilyrði: Kælivara

Upprunaland kjöts: Spánn

Innflytjandi: Krónan ehf., Skarfagörðum 2, 104 Reykjavík

Framleiðandi: Krónan ehf.

Dreifing: Verslanir Krónunnar um land allt

Þá kemur jafnfram fram í tilkynningunni að neytendur geti skilað viðkomandi vörum í næstu verslun Krónunnar og fengið þær endurgreiddar. Tekið er fram að frekari rannsókna sé þörf til að staðfesta greininguna.

Matvælastofnun og heilbrigðiseftirlit sveitarfélaga hafa undanfarið staðið fyrir skimun á kjöti á markaði þar sem tekin eru sýni úr innlendu og erlendu kjöti. Heilbrigðiseftirlit sveitarfélaganna sér um sýnatökuna og fer hún fram hjá smásölum.

Í skimuninni er einkum skimað eftir eftirfarandi atriðum:

Salmonellu í svínakjöti.

Kampýlóbakter og salmonellu í alifuglakjöti.

Shigatoxin myndandi E. coli (STEC) í nautagripakjöti.

Shigatoxín myndandi E. coli (STEC) í kjöti af sauðfé (lambakjöt og kjöt af fullorðnu fé).

Skylt efni: matvælaeftirlit | Krónan | salmonella | innfluttningur