Framkvæmdir við Landsmót á Hólum á lokastigi

„Hér er allt á réttri leið og nú tekur við vinna við lokafrágang. Við erum í góðum gír og sannfærð um að mótið verði mjög gott,“ segir Áskell Heiðar Ásgeirsson, framkvæmdastjóri Landsmóts hestamanna, sem fram fer á Hólum í Hjaltadal í lok júní.

 

Heiðar segir að nú um helgina hafi skólahaldi í Háskólanum á Hólum lokið og í kjölfarið allt farið á fullt í þeim framkvæmdum sem ljúka þarf áður en blásið verði til landsmóts. Mannvirkjanefnd LH var í heimsókn á Hólum fyrr í vikunni og tók svæðið formlega út fyrir hönd LH. „Nefndin lýsti yfir ánægju sinni með svæðið og hvernig til hefði tekist með uppbyggingu. Nú tekur við lokafrágangur, það er eitt og annað eftir sem við erum á fullu í að framkvæma núna, en allt er samkvæmt áætlun,“ segir hann.

 

Um liðna helgi voru haldin mót á Hólum, bæði á vegum háskólans og eins heimamanna og komu vellirnir vel út að sögn Heiðars. „Knaparnir voru ánægðir með vellina og við erum auðvitað í skýjunum yfir því,“ segir hann. 

 

Bæta við tjaldstæðum

 

Fyrir liggur á næstu dögum að vinna við lagnir á svæðinu, m.a. rafmagns- og vatnslagnir sem og ljósleiðara og eins verður bætt við tjaldsvæðum, en þau 300 tjaldstæði sem í boði voru með rafmagni seldust upp á skömmum tíma. „Við ætlum að bæta við stæðum, eftirspurnin er mikil,“ segir Heiðar. Ferðaskrifstofan North West Adventures heldur utan um gistirými í Skagafirði í kringum mótið og mjög vel hefur gengið að selja það.

 

Jákvæðar og góðar viðtökur

 

„Miðasala hefur farið fram úr væntingum, við erum þegar búin að selja um 4.000 miða í forsölu og líklega hafa aldrei jafnmargir miðar verið seldir á landsmót miðað við árstíma, það er allur júnímánuður eftir í sölu og yfirleitt fer drjúgt út á þeim tíma,“ segir Heiðar. Forsölu lýkur 15. júní en eftir þann tíma gildir sama miðaverð og í hliði. Enn er því tækifæri á að kaupa miða á landsmót á góðu verði. „Við þurfum svo sannarlega ekki að kvarta yfir viðtökum, þær hafa verið mjög jákvæðar og góðar.“