Flæktur í netinu

Eitt elsta áhugaleikfélag landsins setur nú á fjalirnar einn af gamanleikjum Ray Cooney í leikstjórn Valgeirs Skagfjörð.

Í þessum ágæta farsa fá áhorfendur að fylgjast með leigubílstjóra nokkrum og fjölskyldum hans. Í fleirtölu, já, því leigubílstjórinn lifði nefnilega tvöföldu lífi árum saman – þar sem tvær konur og börn með báðum komu við sögu! Um ræðir sjálfstætt framhald leikritsins vinsæla Með vífið í lúkunum þar sem sagan hefst. Nú er staðan þó þannig að sonur leigubílstjórans úr öðru sambandinu kynnist dótturinni úr hinu og leynilegur lífsmáti leigubílstjórans því í húfi. Þetta er farsi af bestu gerð enda Ray Cooney ekki þekktur fyrir annað og vandi að sjá hvernig hægt er að rekja úr flækjunni.

Formaður leikfélagsins, Sigurlaug Ingimundardóttir, segir að flestir þekki væntanlega leikritið undir nafninu „Með táning í tölvunni“ en þau hafi fengið leyfi þýðanda til að breyta því í Flæktur í netinu, þótti það eiga betur við. Æfingaferlið gekk vel þó páskahátíðin hafi aðeins truflað – enda koma um 30 manns að leiksýningunni þó einungis sjö standi á sviði. „Þegar maður talar um leikhóp heldur fólk oft að bara sé verið að tala um leikarana, en það eru ótalmörg verkefnin sem þarf að leysa til þess að setja verk á svið. Sviðsmynd, búningar, förðun, hljóð og ljós eru meðal þess sem vega þungt og ættu því allir sem áhuga hafa að drífa sig í að vera með,“ segir Sigurlaug.

Áætlaðar sýningar eru dagana 2., 4., 6. og 7. maí kl. 20:00, sýningin á laugardeginum 3. maí er kl. 15:00, sýnt verður í félagsheimilinu Bifröst á Sauðárkróki og miða er hægt að nálgast á www.tix.is.