Endurvekja gömul eplayrki
Spar verlsunarkeðjan og ávaxta- og grænmetisframleiðandinn Frutura vinna í samstarfi að því að rækta tvö gleymd eplayrki og koma þeim aftur í hillur matvöruverslana. Eplayrkin eru Ilzer Rosenapfel, sem þekkist allt frá 1840, og Falchs Gulderling, sem fannst fyrst árið 1870.
Á tilraunakari í Styríu-fylki í Asuturríki eru nú 2.150 eplatré í ræktun. Fyrstu eplin hafa verið tínd og eru á leið í verslanir og skóla í Vínarborg, samkvæmt frétt breska fréttamiðilsins Guardian. Í dag eru aðeins um 10 af þeim 2.000 yrkjum sem eru til sölu í Austurríki í raun austurrísk. Ef tilraunin gengur vel og tekst að framleiða nær gleymdu eplin í matvælaframleiðslu fyrir stórverslanir er stefnan á að selja þau um allt land.
Katrin Hohensinner-Häupl, meðframkvæmdastjóri Frutura, segir verkefnið vera dans á milli nýsköpunar og áralangrar landbúnaðarvitneskju. Að endurvekja gömlu eplayrkin er því bæði að varðveita ræktunarsögu og matarsögu og að stuðla að líffræðilegum fjölbreytileika. Varaforstjóri Spar, Markus Kaser, segir að þetta sé einnig jákvætt fyrir neytendur sem eru símeðvitaðri um uppruna og ræktun matvara.
Elsta eplayrkið sem enn er aðgengilegt er að öllum líkindum Goldparmäne, sem þekkist frá 16. öld frá Normandy í Frakklandi. Yrki hafa bæði horfið vegna loftslagsbreytinga, vegna stríða, við iðnvæðingu landbúnaðar og tilhneigingu markaðsafla til að forgangsraða sætu bragði.
Matgæðingar eru spenntir fyrir því að fá ný bragðtegundir inn á markaðinn. Ilzer Rosenapfel-yrkið er dökkbleikt með ljósgulum eða grænum lit að utan og hvítt safaríkt hold. Ilmur þess er sagður sterkur og kryddaður og bragðið örlítið súrt. Gulderling-yrkið er djúprætt og stærra en hitt. Holdið er safaríkt en stökkt og er bragðinu einnig lýst sem sætu með súrum tón. Hohensinner-Häupl segir einnig að bragðið minni hana á epli úr barnæsku.
