Einni milljón króna úthlutað
Samfélagsverkefnið „Voices of Vík; Language, Culture & Community“, undir forystu Ann Irene Peters, hlaut fyrsta styrkinn úr svonefndum „Hörpusjóði“ Samtaka sunnlenskra sveitar- félaga, en hann var afhentur formlega á aðalfundi samtakanna í Þorlákshöfn 26. júní.
Alls bárust 13 umsóknir í sjóðinn, sem er til minningar um Hörpu Elínu Haraldsdóttur, sem var ötull talsmaður þess að taka vel á móti nýjum íbúum og draga fram það sem sameinar fólk á hverjum stað, en Harpa bjó í Vík í Mýrdal.
Verkefni Ann Irenu byggir á því að styrkja tengsl, þátttöku og tilfinningu fyrir því að tilheyra í hinu fjölmenningarlega samfélagi í Vík í Mýrdal.
Á tímabilinu ágúst 2026 til júlí 2027 verður staðið fyrir fjölmörgum viðburðum þar sem markmiðið er að efla samskipti milli íbúa með íslenskan og erlendan bakgrunn, draga úr félagslegri einangrun og auka samfélagslega samkennd. Meðal verkefna má nefna tungumála- kaffihús, kvikmyndakvöld og „Viks Got Talent“, sem er hæfileikasýning þar sem íbúar deila hæfileikum sínum og menningu.
„Við óskum Ann Irene Peters og íbúum í Mýrdalshreppi innilega til hamingju með styrkinn og hlökkum til að fylgjast með þessu mikilvæga inngildingarverkefni blómstra á komandi misserum,“ segir Ingunn Jónsdóttir, framkvæmdastjóri Samtaka sunnlenskra sveitarfélaga.
