Bleikjur struku

Matvælastofnun var tilkynnt um strok bleikju úr eldisstöð Matorku ehf. að Húsatóftum við Grindavík laugardagsmorguninn 11. apríl.

Fiskurinn var um 600 grömm að meðalþyngd og telur fyrirtækið að um 500 fiskar hafi strokið. Rist á útfalli kers mun hafa gefið sig vegna tæringar með þeim afleiðingum að fiskur komst með útfalli í sjó fram. Viðgerð var framkvæmd strax og gerðar ráðstafanir til þess að skoða ástand annarra kerja ásamt því sem viðbragðsáætlun vegna stroks var virkjuð.

Fulltrúar Matorku telja ekki miklar líkur á að bleikjan sem strauk geti lifað í fullsöltum sjó. Matvælastofnun vinnur að rannsókn málsins og mun gefa út eftirlitsskýrslu þegar rannsókn er lokið. Frá þessu er greint í fréttatilkynningu frá Matvælastofnun.