Baldur og Herjólfur sigla til og frá Vestmannaeyjum
Ferjurnar Baldur og Herjólfur munu sigla til og frá Vestmannaeyjum frá 8. júní næstkomandi. Eyjólfur Ármannsson innviðaráðherra kynnti þessar breytingar á íbúafundi sem Vegagerðin hélt í Vestmannaeyjum í gær. Samráð hefur verið haft við heimamenn í Eyjum og í Breiðafirði vegna þessara breytinga sem eru til komnar vegna vélarbilunar Herjólfs.
Vélabilun varð í annarri vél Herjólfs í apríl og vélin send úr landi til viðgerðar. Gert er ráð fyrir að viðgerð á vélinni ljúki upp úr miðjum júní. Miklar raskanir hafa orðið á ferðum Herjólfs síðan vélabilunin varð. Þegar Herjólfur siglir aðeins á einni vél getur skipið illa siglt til Landeyjahafnar ef ölduhæð fer yfir 2 m eða ef vindur er yfir 12 m/s.
Á næstu vikum verða miklar annir á siglingarleið Herjólfs og flutningar á fólki og faratækjum miklir, meðal annars vegna íþróttaviðburða um helgar.
Ferjan Særún mun sinna siglingum til Flateyjar á Breiðafirði í fjarveru Baldurs og tryggja þjónustu við samfélagið þar.
