Bændablaðið mest lesna blað landsins

Bændablaðið er mest lesni prent­miðill landsins, annað árið í röð, samkvæmt nýjum niðurstöðum úr Prentmiðlamælingu Gallup.

Meðallestur Bændablaðsins á landsvísu reyndist 29,9 prósent og hefur aukist milli ára. Í niðurstöðunum kemur fram að meðalfjöldi lesenda á hvert tölublað sé 70.300 sem þýðir að rúmlega tveir lesendur eru um hvert einasta eintak sem prentað er, en upplag Bændablaðsins er að jafnaði 33.000.

Í fyrsta sinn frá upphafi mælinga reyndist Bændablaðið einnig mest lesni prentmiðillinn á höfuðborgarsvæðinu. Þó litlu muni á lestri höfuðborgarbúa á Morgunblaðinu ber Bændablaðið höfuð og herðar yfir aðra prentmiðla á landsbyggðinni, en 41,6 prósenta svarenda sem búsettir eru utan höfuðborgarsvæðisins sögðust lesa Bændablaðið.

Yngri lesendum fer þó sífellt fjölgandi. Mæling fyrir árið 2022 sýndi 7,5% lestur fólks á aldrinum 18–29 ára. Lesturinn hefur tvöfaldast í þessum aldursflokki því í dag mælist Bændablaðið með 14,8% lestur og er þar einnig mest lesni prentmiðill landsins. Rúmlega 12 prósent lesenda á aldrinum 18–29 ára sögðust lesa Morgunblaðið og ívið fleiri yngri lesendur sögðust lesa Viðskiptablaðið (7,1%) en Heimildina (6,7%).

Bændablaðið er langmest lesni prentmiðillinn þegar skoðað er aldursbilið 35–54 ára. Þar mælist Bændablaðið með 21,9 prósenta lestur, Morgunblaðið með 12,8 prósent, Heimildin með 10,4 prósent og Viðskiptablaðið með 6,1 prósenta lestur. Bændablaðið er frekar lesið meðal karla (32,9%) en kvenna (26,8%) og nýtur mikillar hylli í elsta aldurshópi lesenda, 60–80 ára og er þar með 51% meðallestur.

Mælingin fór fram á síðasta ársfjórðungi ársins 2024. Í Prentmiðlakönnun Gallup er lestur dagblaða mældur með samfelldum hætti. Um 30 svörum er safnað á hverjum degi, eða um 2.500 svörum á ársfjórðungi. Í úrtakinu eru Íslendingar á aldrinum 18–80 ára af landinu öllu.