Aukin losun gróðurhúsalofttegunda vegna framkvæmda
- Hálfsársuppgjör loftslagsbókhalds Landsvirkjunnar
Í tilkynningu frá Landsvirkjun segir að heildarlosun gróðurhúsalofttegunda frá starfsemi fyrirtækisins hafi aukist um 49% milli ára. Aukning sé tímabundin og megi að mestu rekja til framkvæmda við Vaðölduver, þar sem unnið er að uppsetningu á fyrsta vindorkuveri landsins, og undirbúningi Hvammsvirkjunnar. Þetta kemur fram í hálfsársuppgjöri loftslagsbókhalds fyrir árið 2026
Heildarlosun gróðurhúsalofttegunda frá starfsemi Landsvirkjunar, bæði vegna orkuvinnslu og framkvæmda, nam 7,6 g CO2-íg/kWst. Mæld í tonnum jókst hún um 36% og nam 47.400 tonnum CO2-ígilda, þar af var losun vegna orkuvinnslunnar um 13.400 tonn. Kolefnisspor á orkueiningu, þ.e.a.s. losun að frádreginni kolefnisbindingu, var 4,6 gCO₂-íg/kWst. Mælt í tonnum var kolefnissporið 28.604 tonn CO2-ígilda en kolefnisbinding á vegum fyrirtækisins var 18.800 tonn eða 5.400 tonnum CO2-ígilda meiri en losun vegna orkuvinnslu.
Enn í samræmi við markmið um 1,5°C hlýnun
Á sama tíma og losun vegna framkvæmda jókst, dróst losun gróðurhúsalofttegunda vegna orkuvinnslu saman. Losun vegna orkuvinnslu á orkueiningu hjá Landsvirkjun nam 2,1 grömmum koldíoxíðígilda á hverja unna kílóvattstund á fyrri helmingi ársins 2026 og dróst saman um 27% frá árinu áður. Samdráttinn megi að mestu rekja til þess að losun frá jarðvarmastöðvum minnkaði um 37% milli ára vegna viðhaldsstopps í Kröflustöð. Losun frá jarðvarmavinnslu sé stærsti beini losunarþátturinn í starfsemi Landsvirkjunnar. Losun frá lónum hafi einnig dregist saman um 24% milli ára. Sú losun sé háð veðurfari og ræðst af fjölda þeirra daga sem lón eru ísilögð.
Forðuð losun vegna raforkuvinnslu Landsvirkjunar á fyrri hluta ársins nam um 1,4 milljónum tonna CO2-ígilda.
Samkvæmt Landsvirkjun samræmist orkuvinnslan enn markmiðum heims um 1,5°C hlýnun og heildarlosun er áfram undir viðmiðum um kolefnishlutleysi orkufyrirtækja, 9,1 g CO2-íg/kWst, sem fjallað er um í aðgerðaáætlun í loftslags- og umhverfismálum.
