Áfram stutt við LED-væðingu garðyrkjubænda
Loftslags- og orkusjóður úthlutaði nýverið rúmlega 118 milljónum króna í styrki til orkusparandi verkefna í gróðurhúsum.
Styrkirnir renna til 11 býla og miða að því að draga úr raforkunotkun og bæta orkunýtni íslenskra gróðurhúsa. Fyrst og fremst er þar um að ræða innleiðingu á LED-ljósabúnaði og annars orkusparandi búnaðar, sem getur dregið úr raforkunotkun í gróðurhúsum um 40–60%.
Sambærileg úthlutun var síðasta sumar þegar sjóðurinn úthlutaði sömu fjárhæð til tíu verkefna. Í umfjöllun umhverfis-, orku- og loftslagsráðuneytisins kemur fram að samanlagt er gert ráð fyrir að verkefnið geti náð fram raforkusparnaði sem nemur 17,8 gígavattstundum á ári. Það samsvari árlegri raforkunotkun 3.900 heimila eða árlegri notkun 5.900 rafbíla.
Haft er eftir Jóhanni Páli Jóhannssyni umhverfis-, orku- og loftslagsráðherra að þetta sé í fyrsta skiptið í áratugi sem stjórnvöld ráðist í skipulegan fjárfestingastuðning við framleiðendur garðyrkjuafurða. „Styrkirnir skila sér í lækkandi raforkukostnaði og þannig aukinni framleiðni og samkeppnishæfni ylræktar á Íslandi, sem aftur skilar sér til neytenda og samfélagsins alls.“
