Æfingamót Skákskólans hafið!

Æfingamót Skákskólans er í fullum gangi þessa dagana. Mótið var upphaflega hugsað sem upphitun fyrir skákferðir erlendis hjá ungu kynslóðinni komandi haust, en eins og þekkt er, er minna um kappskák yfir hásumarið á Íslandi. Það þýðir því lítið að mæta æfingalaus til leiks að hausti. Mótið er skipað nemendum Skákskólans og landsliðsfólki í bland við skákáhugamenn sem vilja halda sér í æfingu með því að tefla við aðra metnaðarfulla skákmenn. 

Fyrirkomulagið er þannig að tefldar eru sjö kappskákir, tvær á viku í ágústmánuði, en hægt er að taka frjálsar hjásetur gegn hálfum vinningi allt mótið. Þannig geta menn teflt kappskákir í amstri dagsins, tekið hlé þegar þess þarf, en geta þó teflt fáeinar skákir. Til að undirstrika að um æfingamót er að ræða, er þátttaka ókeypis og engin verðlaun en mótið samt reiknað til kappskákstiga. Nú þegar hafa ungir skákmenn fengið mörg góð tækifæri til að kljást við reyndari og sterkari skákmenn.

Hér heima er það helst að frétta úr skákinni að Minningarmót Friðriks Ólafssonar, sem skákáhugamenn hafa beðið í ofvæni eftir að yrði auglýst, er komið á dagskrá og skráning er hafin. Mótið er haldið í samstarfi Skáksambands Íslands og Taflfélags Reykjavíkur, en Friðrik var liðsmaður TR frá 11 ára aldri og þar til hann lést, 90 ára. Líklega hafa fáir verið samfleytt eins lengi í T.R. Vart þarf að kynna Friðrik hér, en ég minni þó á bók Helga Ólafssonar sem ber einfaldlega nafnið – Friðrik Ólafsson. Bókin er skyldueign þeirra sem vilja kynna sér feril okkar besta manns. Mótið verður 24. nóvember til 1. desember. Ekki veit ég hvort það sé tilviljun, en það er vel við hæfi að binda enda á mót til minningar um þjóðhetjuna Friðrik, á fullveldisdegi Íslands. Helgina fyrir mótið verður einnig haldið stórmót á Mývatni. Mótin tvö munu því eflaust laða að erlenda keppendur.

Í annarri umferð æfingamóts Skákskólans fékk undirritaður tækifæri til að binda endi á skák sína með skemmtilegum drottningarvinningi, sem lesendur fá að kljást við. Í stöðumyndinni sem hér fylgir á hvítur leik, og vinnur.

Ef lesendur Bændablaðsins luma á áhugaverðum skákum geta þeir haft samband.

Umsjón: Gauti Páll Jónsson

gauti.pj[hjá]hotmail.com