Aðalskráningu lokið á fornminjum í Rangárþingi ytra

Á dögunum kom Kristborg Þórsdóttir fornleifafræðingur færandi hendi í stjórnsýsluhúsið á Hellu með tveggja binda áfangaskýrslu um næstsíðasta áfanga fornleifaskráningu í Rangárþingi ytra. 

 

Í henni er fjallað um minjar á jörðum í efri hluta Landsveitar á um 700 síðum. Meðal þess sem komið hefur í ljós í þeirri skráningu er fjöldi áður óþekktra bæjarstæða frá víkingaöld, má sem dæmi nefna tóftaþyrpinguna í landi Árbakka, auk víkingaaldarbæjarstæða í landi Lunansholts og Holtsmúla (nú Skeiðvalla). 

 

Þessar fornu minjar eru hluti af mörgum þúsundum minja sem skráðar voru í sveitarfélaginu af Fornleifastofnun Íslands á árunum 2006–2015. „Það er frábært og við getum verið mjög stolt af því að hafa lokið þessari fyrstu umferð fornleifaskráningar sem er undirstaða þess að hægt sé að vinna frekari rannsóknir á menningararfi svæðisins og stuðlað að varðveislu hans fyrir komandi kynslóðir,“ segir Ágúst Sigurðsson, sveitarstjóri.