Áætlaður 18% samdráttur í losun frá áburði

Loftslags- og orkusjóður úthlutaði 80 milljónum króna til 42 verkefna sem fela í sér innleiðingu áburðartækni til að draga úr losun frá landbúnaði. Áætlaður samanlagður samdráttur vegna verkefnanna nemur 1.007 tonnum CO₂-ígilda á ári. Það jafngildir um 18% af allri losun gróðurhúsalofttegunda vegna áburðarnotkunar árið 2024.

Alls bárust 83 umsóknir um styrki að fjárhæð 282 milljónir króna. Stærsta úthlutunin var til verkefna sem sóttu um GPS áburðadreifara, búnaði til niðurfellingar áburðar og annarri tækni sem eykur nákvæmni við dreifingu og bætir nýtingu næringarefna. Lögð var áhersla á að forgangsraða verkefnum sem skila mestum samdrætti í losun gróðurhúsalofttegunda. Þóttu GPS áburðadreifari og niðurfellingabúnaður hagkvæmustu leiðirnar.

Ekki var veittur styrkur til verkefna sem höfðu verið fjármögnuð og búnaður þegar kominn í notkun. Einnig fékkst ekki styrkur til kaupa á dráttarvélum, þar sem það þótti orka tvímælis að styrkja kaup á vélum sem ganga fyrir jarðefnaeldsneyti.