30 milljón salatplöntur blaðlúsum að bráð
Blaðlúsafaraldur kom nýlega upp í salatrækt á Bretlandseyjum. Samkvæmt Blaðsalatsbandalagi Bretlands (British Leafy Salads Association eða BLSA) geta ræktendur búist við allt að 10 milljón punda tjóni þar sem reiknað er með því að 30 milljón salatplöntur verði ónothæfar vegna skaðvaldsins.
Veður hefur verið hlýtt og þurrt á Bretlandseyjum í sumar en eru það kjörskilyrði fyrir blaðlýsnar. Í tilkynningu BLSA kemur fram að faraldurinn sé sá versti í áratugi. Salatbændur víðs vegar um England hafa hlotið tjón, bæði í Suður- og SuðausturEnglandi, í norðanverðu landinu sem og í miðhéruðum Englands (e. Midlands) og í Austur-Anglíu.
Búast má við að jöklasalat og rómarsalat komi verst út úr faraldrinum en græn blöð eru í meiri hættu en rauð. Blaðlúsin er af tegundinni Nasonovia ribisnigri og herjar sérstaklega á salatplöntur og kál. Hún heldur sig helst til í miðju plöntunnar og getur því verið erfitt að ráða við hana. Í gegnum tíðina hafa ræktendur notað skordýraeitur af gerðinni neonicotinoids til að sporna við blaðlúsinni. Þau efni eru mörg hver bönnuð vegna slæmra áhrifa þeirra á býflugur. Hægt er að losna við blaðlúsina í einhverjum mæli með soggildrum (e. suction traps) og vatnsgildrum en BSLA vinnur nú einnig að því í samstarfi við ræktendur, rannsakendur og stjórnvöld að finna langtíma lausnir gegn blaðlúsinni.
Breskar matvöruverslanir selja aðallega breskt salat á sumrin og skipta síðan yfir í innflutt salat að hausti. Nú má reikna með því að innflutt salat komi fyrr í hillurnar til þess að bæta upp fyrir þann uppskerumissi sem blaðlúsin hefur valdið.
