We will Rock you
Leikfélag Keflavíkur frumsýndi söngleikinn We Will Rock You í byrjun síðasta mánaðar við öflugar undirtektir og vilja leikhúsgestir meina að sjaldan hafi sést viðlíkur kraftur á sviði.
Verkið sem fjallar um frelsi, sjálfs- mynd, uppreisn og mátt tónlistar er skrifað af hinum breska Ben Elton í samstarfi við gítarleikarann Brian May og trommarann Roger Taylor úr Queen. Ben, sem margir kannast við sem einn höfunda Black Adder, hefur m.a. leikstýrt stórum sýningum yfir árin, auk þess að snúa sjálfur á svið í West End árið 2023. Þar lék hann og leikstýrði hann sinni eigin sýningu, hinni einu og sönnu We Will Rock You og tókst þar á við hlutverk „Rebel Leader“ (áður þekktum sem Pop).
Söngleikurinn We Will Rock You er í senn óður til tónlistar Queen og dystópísk framtíðarsýn. Sagan gerist á plánetunni iPlanet, sem áður hét Jörðin, þar sem alræðisfyrirtækið Globalsoft ræður ríkjum. Í þessum heimi er öllu stýrt; ungmenni klæðast eins, hugsa eins og hlusta á tölvugerða popptónlist. Lifandi tónlist og hljóðfæri hafa verið bönnuð og gleymd.
Aðalpersónurnar, Galileo og Scaramouche, eru utangarðsfólk sem finna ekki samhljóm í þeim einsleita veruleika sem lífið er orðið. Þau sameinast því hópi uppreisnarseggja, svokallaðra „Bóhema“, í leit að týndum vísbendingum um fortíðina – sérstaklega goðsagnakennda „rokkið“. Boðskapur verksins snýst um einstaklingsfrelsið, sköpunargleðina og mikilvægi þess að týna ekki menningararfinum í tæknivæddum heimi. Verkið er í íslenskri þýðingu Jóhanns Axels Andersen, sem hefur fengið lof fyrir að fanga hinn alþekkta beitta breska húmor. Meðlimir leikfélagsins uppfærðu textann þó aðeins og staðfærðu og útkoman ekkert annað en snilld.
Leikstjórn er í höndum Kristínar Leu Sigríðardóttur, tónlistarstjóri er Sigurður Smári Hansson og danshöfundur Helga Ásta Ólafsdóttir.
Sýningar verða dagana 16., 17., 22., 23. og 26. apríl kl. 20 og nú er um að gera að reyna að ná sér í miða á tix.is.
(Varað er við notkun strobelýsingar í sýningunni.)
