Viðskiptahraðall fyrir íslensk matvælafyrirtæki

Growth-Train er svokallaður viðskiptahraðall með áherslu á vaxtarfyrirtæki í matvæla- og/eða heilsufæðisgeiranum. Viðskiptahraðallinn nær yfir sjö vikur með sex ólíkum lotum þar sem farið er í gegnum möguleika fyrirtækja og stefnu. Falast er eftir fyrirtækjum frá Íslandi til þátttöku, en umsóknarfrestur er til 1. september.

 

Eyþór Ívar Jónsson er í forsvari fyrir verkefnið sem er staðsett í Suður-Jótlandi. „Hugmyndin er að auka stækkunarmöguleika fyrirtækja og búa til tengslanet sem hjálpar fyrirtækjunum að ná árangri mun hraðar en ella. Við erum einnig með fjárfesta, bæði viðskiptaengla og fjárfestingasjóði, sem hafa áhuga á að efla fyrirtæki í matvæla- og/eða heilbrigðisgeiranum. Viðskiptahraðallinn hefst þann 13. október næstkomandi og uppskeruhátíð verður haldin 1. desember. 

 

Við erum að keyra verkefnið í fyrsta skipti og þess vegna verður það í Suður-Jótlandi í Danmörku þar sem ég er staðsettur, nánar tiltekið í Nykobing-Falster. Við höfum í hyggju að keyra The Growht-Train víðar á næstu misserum þar sem „konseptið“ er að mörgu leyti nýstárlegt. Við höfum sendiherra í um þrjátíu löndum og Ingi Björn Sigurðsson frumkvöðull er sendiherra okkar á Íslandi. Sjávarklasinn er samstarfsaðili okkar þar. Tengslanet sendiherranna nær út um allan heim.“

 

Leita að íslenskum fyrirtækjum

 

„Við höfum mikinn áhuga á að fá eitt til tvö fyrirtæki frá Íslandi sem hafa náð verðskulduðum árangri á Íslandi og vakið athygli fyrir nýsköpun og frumkvæði,“ segir Eyþór. „Við getum hjálpað til við að opna leiðir sem geta aukið vaxtarlíkur þessara fyrirtækja verulega. Við erum með samstarfssamning við stórar ráðstefnur og fyrirtæki sem sérhæfa sig í matvælum.“

 

Lærir meira á sjö vikum en hingað til 

 

Eyþór Ívar er nokkuð viss um að sá frumkvöðull sem tekur þátt í verkefninu muni læra mjög mikið á stuttum tíma. „Ég held að viðkomandi muni læra meira á þessu verkefni en hann hefur lært hingað til í viðskiptum og rekstri vaxtarfyrirtækja. Þetta munu verða krefjandi sjö vikur sem munu breyta möguleikum fyrirtækisins og frumkvöðulsins til framtíðar. Við erum með mjög flott ferli og mentora sem munu hjálpa til við að skapa ný tækifæri og vaxtarmöguleika. Við höfum notað líkingu við lestarferð, þetta verður eins og að fara í hraðlest í þeim tilgangi að skapa árangur, þekkingu og tengslanet.“

 

Að sögn Eyþórs Ívars er Growth-Train verkefnið ekki eingöngu fyrir frumkvöðla eða sprotafyrirtæki – og hvetur alla sem áhuga hafa til að sækja um. Í lok verkefnisins kynna fyrirtækin sig fyrir hópi af fjárfestum í Danmörku, einnig hópi af alþjóðlegum „englafjárfestum“ og að endingu hópi frá Ítalíu.  

 

Það kostar ekkert að taka þátt fyrir þau fyrirtæki sem eru valin fyrir utan ferðakostnað og uppihald. Fyrir utan vinnusmiðjurnar og kynningarmöguleika á vörunum þá fá fyrirtækin aðgang að einhverju viðamesta drefikerfi í Danmörku á Suður-Jótlandi. 

 

Frekari upplýsingar má finna á.  http://growth-train.dk/.