Vel á fjórða tug geita verða skornar niður
Hátt á fjórða tug geita munu vera á bæjum á Norðurlandi þar sem riðuveiki hefur greinst í sauðfé. Búið er að lóga 16 geitum til rannsókna og að sögn héraðsdýralæknis í Norðvesturumdæmi fannst ekki í þeim riða.
Jón Kolbeinn Jónsson, héraðsdýralæknir í Norðvesturumdæmi, segist ekki hafa tölu um fjölda geita í Tröllaskagahólfi á hraðbergi en segir að þær séu á þó nokkrum bæjum. „Sem betur fer er ekki mörg tilfelli þar sem geitur hafa verið á bæjum þar sem riða hefur komið upp. Við höfum þegar lógað átta geitum sem hafa verið fluttar nýlega frá bæ þar sem riða kom upp og við rannsókn kom í ljós að þær voru riðufríar. Öðrum átta var svo lógað seinna og þær reyndust einnig lausar við riðu.“
Að sögn Jóns hefur fram til þessa hefur ekki greinst riða í íslenskum geitum til þessa.
Sjúkdómurinn hefur fundist geitum í Bandaríkjunum og vitað er um tilfelli í Noregi.
Anna María Flygenring, formaður Geitfjárræktarfélags Ísland, segir að geitfjárstofninn á Íslandi telji innan við 1500 fjár og að því sé full ástæða til að hafa áhyggjur af honum enda sé hann tæknilega í útrýmingarhættu. Hún segir einnig að ekki hafi greinst riða í íslenskum geitum og ljóst sé að víðtækar rannsóknir skortir sárlega.
„Ekkert ráð virðist koma til greina annað en niðurskurður, en þurfa geiturnar endilega að fylgja sömu reglum og sauðfé? Þær eru öðruvísi, meira að segja genasamsetning þeirra er öðruvísi en sauðfjár,“ segir Anna.
