Vegleysur á Vestfjörðum

Sem frambjóðandi á ferð fór ég akandi um Vestfirði um helgina. Vegur um Strandir var fyrstur yfirferðar og þótti mér viðhaldi hans verulega ábótavant.

Mögulega er slakt viðhald rökstutt með strjálli byggð en lítið vissi ég um framhaldið og þann skort á vetrarþjónustu sem vegir Vestfjarða líða fyrir þrátt fyrir mikla umferð og þungaflutninga. Á yfirliti Vegagerðarinnar um vetrarþjónustu milli landshluta er auðséð sú mismunun sem á sér stað í vetrarþjónustu á Vestfjörðum miðað við önnur svæði, þrátt fyrir ákall samfélaganna fyrir vestan um annað.

Samgöngur eru risastórt byggðarmál. Fyrirtæki treysta á skilvirkar samgöngur til að flytja framleiðslu af landsbyggðinni til markaða og íbúar reiða sig á flutning á nauðsynjavörum inn á svæðin. Góðar samgöngur tengja saman ólík byggðarlög víða um land og auka tækifæri fólks til fjölbreyttari atvinnu. Þær bæta aðgengi fólks að menntun og heilbrigðisþjónustu, auk þess sem börn sækja afþreyingu milli byggðarkjarna. Öruggar samgöngur minnka slysahættu, stuðla að tryggari ferðalögum fyrir almenning og eru lífsnauðsynlegar í náttúruhamförum til að tryggja flutning hjálpargagna.

Á Vestfjörðum upplifði ég öryggisleysi við að aka ýmist í glerhálku eða þæfingi á milli norðanverðra og sunnanverðra Vestfjarða þar sem vetrarþjónustu er ábótavant. Slök vetrarþjónusta veldur einangrun og slysahættu og ekki er hægt að treysta á seiglu fólks til að umbera þetta ástand í nútímasamfélagi. Norðvesturkjördæmi hefur dregist langt aftur úr öðrum kjördæmum hvað varðar bættar samgöngur og er nauðsynlegt að setja aukinn kraft í landshlutann. Nauðsynlegt er að klára þau verkefni sem eru ókláruð, samanber Dynjandisheiði, hvar aka þarf örfáa en viðsjárverða kílómetra á þröngum og kræklóttum vegi með tilheyrandi hættu.

Til þess að tryggja samgöngur á Vestfjörðum þarf að minnsta kosti þrenn jarðgöng til viðbótar og er löngu tímabært að við lítum til frænda okkar í Færeyjum sem hafa borað átta jarðgöng á síðustu sex árum. Á sama tímabili hérlendis hafa ein göng verið opnuð, Dýrafjarðargöng, og hvergi er verið að bora sem stendur. Færeyska jarðgangauppskriftin er til, notum hana.

Góðar samgöngur eru grunnþáttur í að byggja upp sterk, tengd og sjálfbær samfélög og stuðla að efnahagslegri velmegun og jöfnuði. Fjárfesting í samgöngum getur haft víðtæk áhrif til góðs og er lykilatriði í byggðarmálum. Það er löngu tímabært að Norðvesturkjördæmi sé forgangsraðað efst í samgöngubótum.