Úrslitin á Íslandsmótinu í matarhandverki

Höfundur: smh

Askurinn, Íslandsmeistarakeppni í matarhandverki, var haldin dagana 19.-21. nóvember. Úrslitin voru síðan kynnt á matarhátíð á Hvanneyri á laugardaginn, en veitt voru gull-, silfur- og bronsverðlaun fyrir efstu þrjú sætin í hverjum keppnisflokki – og er gullverðlaunahafi jafnframt Íslandsmeistari í viðkomandi flokki.

Keppt var í tíu flokkum matvæla.Gæðamat dómara fór fram miðvikudaginn 20. nóvember í húsakynnum Matís, þar sem þættir eins og áferð, útlit, lykt, bragð og nýnæmi var metið, en 133 vörur voru skráðar til leiks.

Keppnin er að sænskri fyrirmynd og hefur sambærilega hátíð verið haldin þar frá 1998. Íslandsmeistarakeppnin í matarhandverki hefur einu sinni áður verið haldin, árið 2014, en þá var hún haldin í samstarfi Matís og norræna verkefnisins Ný norræn matvæli (Ny Nordisk Mad). Þar kepptu 110 vörur frá öllum Norðurlöndunum í átta flokkum.

Núna heldur Matís keppnina í samstarfi við Sóknaráætlun Vesturlands, Markaðsstofu Vesturlands, Landbúnaðarháskóla Íslands og Matarauð Íslands.

Mjólkurvörur.

Úrslitin voru eftirfarandi:

Bakstur

Gull, Rúgbrauð – Brauðhúsið ehf
Silfur, Rúg hafrabrauð – Brauðhúsið ehf

Ber, ávextir og grænmeti

Gull, Þurrkaðir lerkisveppir – Holt og heiðar ehf
Silfur, Grenisíróp – Holt og heiðar ehf
Brons, Sólþurrkaðir tómatar – Garðyrkjustöðin Laugarmýri

Ber, ávextir og grænmeti – sýrt

Gull, Pikklaðar radísur – Bjarteyjarsandur
Silfur, Kimchi, krassandi kóreönsk blanda – Huxandi Slf
Brons, Pylsukál, eitt með öllu – Huxandi slf

Ber, ávextir grænmeti, drykkir

Gull, Aðalbláberjate – Urta islandica ehf
Silfur, Krækiberjasafi – Íslensk hollusta ehf

Fiskur og sjávarfang

Gull, Birkireyktur urriði – matarhandverk úr Fram-Skorradal
Silfur, heitreyktur makríll – Sólsker
Brons, Léttreyktir þorskhnakkar – Sólsker

Vörur úr flokkunum Kjöt og kjötvörur annars vegar og svo Kjöt og kjötvörur, hráverkaðar.

Kjöt og kjötvörur

Gull, Gæsakæfa – Villibráð Silla slf
Silfur, Taðreykt hangikjöt – Sauðfjárbúið Ytra-Hólmi

Kjöt og kjötvörur, hráverkaðar

Gull, Rauðvínssalami – Tariello ehf
Silfur, Nautasnakk – Mýrarnaut ehf
Brons, Ærberjasnakk – Breiðdalsbiti

Mjólkurvörur

Gull, Sveitaskyr – Rjómabúið Erpsstaðir
Silfur, Búlands Havarti – Bíobú ehf
Brons, Basilikusmjör – Á Ártanga

Nýsköpun (2 með gull)

Gull, Bopp – Havarí
Gull, Söl snakk – Bjargarsteinn Mathús
Brons, Saltkaramellusíróp – Urta Islandica ehf

Vörur úr flokknum Nýsköpun drykkir.

Nýsköpun drykkir

Gull, Glóaldin Kombucha Iceland – Kúbalúbra ehf
Silfur, Súrskot- safi úr Kimchi – Huxandi Slf
Brons, Rababaravín – Og natura

Einstakt bragð, gæði og ímynd

Í tilkynningu frá Matís um fyrirkomulag keppninnar segir: „Matarhandverk snýst um að skapa vörur þar sem lögð er áhersla á einstakt bragð, gæði og ekki síst ímynd, sem iðnaður getur ekki búið til. Áherslan er á að nota staðbundin hráefni, framleiðslu í litlu magni sem er oft svæðisbundin. Matarhandverksvörur eru heilnæmar, án óþarfra aukaefna og vörur sem hægt er að rekja til upprunans. Aðalsmerki matarhandverks er að nota það hráefni, mannafla og verkkunnáttu sem fyrirfinnst á staðnum, í gegnum alla framleiðslukeðjuna. Í matarhandverki er lögð áhersla á að þróa hefðbundnar vörur fyrir neytendur dagsins í dag.“