Upplýsingagátt um almyrkvann 12. ágúst

Ný upplýsingagátt um almyrkvann 12. ágúst er kominn í loftið á Ísland.is. Þar má finna allt efni um almyrkvann, til dæmis hvort gripið verði til takmarkana á umferð og hvaða götur verða lokaðar. Einnig verða þar tenglar á frekari upplýsingar, meðal annars á viðbragðsaðila og markaðsstofur landshluta á almyrkvasvæðinu sem hafa unnið með sveitarfélögum að undirbúningi fyrir almyrkvann.

Á nýju vefnum verður einnig hægt að finna almennar og fræðandi upplýsingar um almyrkvann. Sævar Helgi Bragason, jarðfræðingur og vísindamiðlari verður stjórnvöldum til ráðgjafar varðandi fræðslu og miðlun upplýsinga um almyrkvann og undirbúning stjórnvalda.

Fjöldi manns stefnir að því að njóta almyrkvans 12. ágúst, Íslendingar og erlendir ferðamenn í bland. Því má reikna með álagi á samgöngur, útivistarsvæði og viðbragðsaðila. Í tilkynningu á vef stjórnarráðsins er bent á að íbúar á suðvesturhorni landsins séu í einstakri stöðu til að fylgjast með almyrkvanum og biðlað til þeirra að njóta hans heima og takmarka þannig umverð og stuðla að almannaöryggi. 

Vefurinn verður uppfærður reglulega fram að almyrkvanum. Fólk er hvatt til að fylgjast með þeim leiðbeiningum sem þar birtast til að geta undirbúið sig sem best fyrir daginn. Stýrihópur sem forsætisráðherra skipaði hefur unnið að því að safna upplýsingunum saman.