Uppbygging í Vaðlaheiði
„Þróun íbúðarbyggðar í Vaðlaheiði“ er nafn á nýju samstarfsverkefni Eyjafjarðarsveitar og Svalbarðsstrandarhrepps.
Skipulagsverkefnið gengur út á að móta heildstæða stefnu um þróun byggðar í Vaðlaheiði til framtíðar. Svæðið sem um ræðir nær frá norðurmörkum Geldingsár í Svalbarðsstrandarhreppi og að suðurmörkum Leifsstaða í Eyjafjarðarsveit og er alls um 1.900 hektarar að flatarmáli. Svæðið er í eigu einkaaðila og er uppbygging á svæðinu á þeirra vegum.
„Skipulagsáætlun af þessu tagi nefnist rammahluti aðalskipulags, en það er sá hluti aðalskipulags þar sem útfærð eru ákveðin afmörkuð svæði sveitarfélagsins með það að markmiði að ákvarða nánar landnotkun, svo sem um meginþætti þjónustukerfa og að afmarka byggingarsvæði eða áfanga deiliskipulagsáætlana. Þessi skipulagsáætlun mun svo liggja til grundvallar deiliskipulögum sem í kjölfarið verða unnin fyrir spildur innan svæðisins,“ segir Vigfús Björnsson, skipulags- og byggingarfulltrúi Eyjafjarðar.
Á svæðinu er gert ráð fyrir um 650 íbúðarhúsum en það gæti þýtt 1.500 til 1.800 manna byggð. „Ég hef trú á að svæðið verði verulega vinsælt. Það er það nú þegar og mikil ásókn í að deiliskipuleggja og byggja upp á svæðinu. Auknar vinsældir svæðisins er ein aðalástæða þess að ákveðið var að fara í skipulagsvinnuna. Þarna eru nokkur íbúðasvæði og frístunda- svæði sem byggst hafa upp í skorpum á frekar löngu tímabili, það hefur orsakað það að skipulagsyfirvöld hafa hingað til ekki haft heildarmynd af svæðinu og verið að bregðast við óskum landeigenda hverju sinni án þess að hafa skýra stefnu fyrir svæðið í heild. Fyrir vikið er svæðið svolítið „kaótískt“ þó að því fylgi vissulega ákveðinn sjarmi,“ segir Finnur Yngvi Kristinsson, sveitarstjóri Eyjafjarðarsveitar.
Kynning á skipulagstillögunni stendur til 9. febrúar og mun fara fram opinn kynningarfundur vegna verkefnisins á sveitarskrifstofu Eyjafjarðarsveitar kl. 20, fimmtudaginn 1. febrúar.
