Ungmenni berjast gegn stöðnun í dreifbýli

Norrænt ráð 25 ungmenna frá öllum Norðurlöndum sat nýlega fund með norrænum ráðherrum byggðaþróunar og skipulagsmála þar sem þau birtu þeim tillögur til að auka aðdráttarafl landsbyggðarinnar fyrir ungt fólk.

Tillögurnar eru fjörutíu talsins og eru lykilaðgerðir til að berjast gegn stöðnun samfélaga í dreifbýli að því er fram kemur í tilkynningu frá Nordregio, rannsóknastofnun Norrænu ráðherranefndarinnar, sem hélt utan um verkefni ungmennaráðsins.

Í tilkynningu segir að mörg sveitarfélög á landsbyggðinni búi við fólksfækkun vegna þess að ungt fólk flyst í burtu og snýr ekki aftur. „Það er algeng skoðun á meðal ungs fólks að til að ná árangri og eiga gott líf þurfi að flytja til borga eða stærri bæja, sem leiðir til þess að landsbyggðin verður vanmetin. Hins vegar fer áhuginn vaxandi á að breyta þessari þróun og sýna að landsbyggðin er í raun full af tækifærum,“ segir í tilkynningunni.

Meðal tillagna ungmennaráðsins er að bæta almenningssamgöngur, bjóða upp á fjölbreyttar lausnir í húsnæðismálum og efla tækifæri til menntunar í samræmi við atvinnulífið á svæðinu auk nýjunga í fjarvinnu. Ungmennin leggja einnig áherslu á þarfir fyrir opinber rými jafnt sem afþreyingu og viðburði sem sameina kynslóðir og hjálpar til við að skapa sterka samkennd í samfélaginu.

„Við trúum því að tillögurnar geti spilað hlutverk í að endurvekja líf í dreifbýlum samfélögum,“ segir Mari Wøien Meijer, sem leitt hefur verkefnið hjá Nordregio.

Haft er eftir Selmu Dís Hauksdóttur, sem var ein af íslensku fulltrúum ungmennaráðsins, að fjarvinna og aðrar stafrænar lausnir séu tilvaldar til að koma ungu fólki á landsbyggðinni inn á vinnumarkaðinn og gera þeim kleift að finna vinnu sem hæfir menntun þeirra. „Þar sem vinnumarkaðurinn á landsbyggðinni er nátengdur húsnæðismöguleikum er mikilvægt að vinna saman við húsnæðisþróun og tryggja tækifæri fyrir ungt fólk á landsbyggðinni,“ segir Selma.

Hægt er að lesa skýrslu norræna ungmennaráðsins á vefsíðu Nordregio.