Unga fólkið og andlitin 300 á heilsíðu Morgunblaðsins

Fyrir nokkru birtust 300 andlit ungra Íslendinga á heilsíðu Morgunblaðsins. Það var ánægjuleg sjón. Við erum öll ungir sem gamlir vinir Evrópu og styðjum flest EES-samninginn, því að hann hefur verið landinu til gagns. Við viljum þó fara gætilega, eiga og stjórna sjálf dýrmætum auðlindum okkar, varast erlenda ásælni og ekki beygja okkur fyrir þrýstingi embættismanna ESB.

 

Þeir vilja ná auðlindum okkar undir sameiginlega stjórn Evrópubandalagsins. Slík stjórn getur orðið skilningslítil á sérstöðu Íslands. Samþykkt orkupakka þrjú er hluti af ásælni Evrópubandalagsins. Æskufólk, standið sjálfra ykkar vegna og vegna barna ykkar til varnar auðlindum okkar og verjið af kappi sjálfstæði landsins og fullveldi, sem forfeður okkar og mæður börðust fyrir. Látið ekki valdamenn, auðmenn og gróðahyggjumenn blekkja ykkur á óheillabraut til fylgis við orkupakkann.

 

Leggstu undir feld, Steingrímur

 

Ég skora á þig, forseti Alþingis, Steingrímur Sigfússon, að leggjast undir feld og hugsa gagnleg og viturleg ráð til að afstýra vaxandi óeiningu, ólgu og reiði í landinu okkar vegna ástandsins  á Alþingi. Þar ríkir MÁLÞÓF og ÞAGNARÞÓF um orkumálin okkar. 

 

Ef við samþykkjum orku­pakkann glötum við stjórn okkar eigin orkumála. Hún verður tekin úr höndum Íslendinga og fengin sameiginlegri orkunefnd Evrópubandalagsins. Óvissa er um, hvort samþykkt orkupakka þrjú muni  brjóta gegn stjórnarskránni. Framkoma margra alþingismanna, óheilindi og hringl í þessu máli og afstaða í fleiri málum hefur verið til skammar og sært réttlætistilfinningu landsmanna. 

 

Erindi Steingríms á Alþingi og álit Bjarna Benediktssonar

 

Ég hef í höndum erindi þín, Steingrímur, á Alþingi fyrir nokkrum árum þar sem þú varar við horfum í meðferð orkunnar okkar og ásælni Evrópubandalagsins, en það hefur Bjarni Benediktsson einnig gert. Við treystum ykkur í þessu máli þá og síðar. 

 

Við höfum trúað á þig, Steingrímur, og vörn þína fyrir sjálfstæði og fullveldi landsins. Nú viljum við heyra ávarp þitt til þjóðarinnar. Ég vil vita hvort þú hefur skipt um skoðun. Vilt þú nú samþykkja afsal stjórnar landsins  á orkumálunum og vilt þú samþykkja orkupakka þrjú og það sem á eftir fer, númer 4 og 5,  og hvers vegna ef svo er? Hefur þú blekkt okkur og svikið? 

 

Annar Þingeyingur, Þorgeir Ljósvetningagoði, lagðist undir feld á Alþingi fyrir 1000 árum rúmum til að hugsa málin, þegar vandi og ósætti steðjaði að þjóðinni. Þegar hann kom undan feldinum stuðluðu orð hans og ávarp til þjóðarinnar að friði og hann hefur notið virðingar síðan. Hinu sama gætir þú áorkað. Núverandi ráð gagnast ekki. 

 

Fyrst og fremst verðum við að hugsa um auðlindir okkar, sem eru í hættu fyrir sölumönnum og niðurrifsöflum innlendum sem erlendum. Við treystum þér, Steingrímur, til að ávarpa þjóð þína í anda Ljósvetningagoðans og gera þitt til að stuðla að friði. Þín er ábyrgðin mikil vegna þess frumkvæðis sem þú hefur við stjórn umræðna á Alþingi. 

 

Áskorun til ríkisstjórnarinnar

 

Ég skora á alla ríkisstjórnina, sem hefur úrslitavald um meðferð mála á þingi, að gera það sama, leggjast undir feld og hugsa ráð til að stuðla að samstöðu og friði með þjóðinni og afstýra óeiningu og klofningi og reiði meðal almennings. 

 

Ósvífnar og ódrengilegar aðdróttanir

 

Við störf mín á Keldum í 40 ár hef ég kynnst vel fólki á ýmsum aldri um allt land. Þetta er skynsamt og velviljað fólk eins og alþingismenn eru, en hvorki heimskingjar, ellibelgir né popúlistar, eins og þið sumir fylgjendur orkupakkans viljið vera láta. Þið, sem þannig talið, megið skammast ykkar fyrir ósvífnina og ódrengilegar aðdróttanir í garð þjóðhollra manna. Fjölmargir vantreysta alþingismönnum og sjá í gegnum blekkingar sem viðhafðar eru. 

 

Alls staðar þar sem þetta mál kemur til umræðu ríkir undrun og hneykslun á ofbeldi því sem alþingismenn ætla að beita gegn þjóðinni og finna sárt til þess að þjóðaratkvæðagreiðsla kemur ekki til greina. 

 

Hættið, alþingismenn, við þessi óheillavænlegu áform, sem munu leiða til þess að Íslendingar tapa stjórn á sínum eigin orkumálum. Verði orkupakki 3 samþykktur er fyrsta skref stigið í þessa átt. Slík samþykkt mun níða niður traustið á Alþingi og stuðla að klofningi í stjórnmálaflokkum. Við viljum ekki slíka óheillaþróun. Ég trúi að það verði tekið vel eftir því hvaða alþingismenn samþykkja orkupakkann, ef til atkvæðagreiðslu kemur. Slíkt samþykki  gæti og ætti að verða þeim dýrkeypt. 

 

Stöndum vörð um virðingu Alþingis

 

Besta ráðið til að standa vörð um virðingu Alþingis er að fresta umræðum um orkuna fram á haust og herða svo upp hugann, rétta úr bakinu og krefjast þess að undanþága fáist fyrir Ísland vegna þess að málið á ekki við hér.

 

Kæra Katrín Jakobsdóttir forsætisráðherra. Menn trúðu á þig. Þín er ábyrgðin mikil vegna þess sem þú og þitt fólk hefur lofað þjóðinni. Hafið þið svikið okkur? Hvað veldur því, ef svo er? Ég skora á þig að ávarpa þjóð þína og stuðla að friði í stað þess að blása að glóðum ósættis og reiði.

 

Ég hef ekki samstöðu með Miðflokknum ef einhverjum skyldi detta það í hug, en ég finn að svokallað „málþóf“ þeirra á Alþingi um orkupakka þrjú og ÞAGNARÞÓF annarra hefur kallað fram fyrirgefningu á ógætilegum ummælum sem féllu á Klausturbarnum. Þeir hafa hlotið virðingu fyrir að standa fast á sannfæringu sinni og gefast ekki upp fyrir ónotum og rakaleysi orkupakkamanna. Menn finna að undirrótin er umhyggja fyrir fullveldi og sjálfstæði landsins.

 

Sigurður Sigurðarson

dýralæknir