Umhverfisskóli Íslands

Umhverfið byrjar utan dyra heima hjá okkur, við leik,- grunn- og framhaldsskóla. Umhverfið er jú allt utandyra og þar kemur garðyrkja mest í nærumhverfinu en einnig í fjærumhverfi.

Þess vegna er rétt að skoða Reyki sem umhverfisskóla í stóra samhenginu.

Landsvæði Reykja og allt umhverfi í Ölfusi er mjög fjölbreytilegt, Hengilssvæðið til norðurs með öllum sínum jarðhita, hraunin á Hellisheiði í vesturátt, votlendi og sandar með fjölskrúðugu fuglalífi í suðurátt.

Undanfarin 60 ár hefur verið unnið ötullega að uppgræðslu allt frá Ölfusárósum að Krísuvík og nú á síðustu árum mikil skógræktaráform vestan Þorlákshafnar. Á Hengilssvæðinu öllu allt að Þingvallavatni er stöðugt unnið að bættu aðgengi ferðafólks með náttúruverndarsjónarmið að leiðarljósi.

Við ræðum stöðugt um grænni framtíð en hvernig og hvar getum við gert þetta að veruleika. Hver er framtíðarsýn okkar í umhverfismenntamálum?

Brandur Gíslason.

Eru Reykir í Ölfusi ekki besta lausnin?

Umhverfisskóli hefur mjög víðtækt starfssvið og að honum kæmu mörg ráðuneyti.

Umhverfisráðuneytið í broddi fylkingar síðan landbúnaðar-, iðnaðar- og menntamálaráðuneytið. Sem sagt, þetta er ekki bara málefni land­búnaðar og alls ekki á þann hátt sem nú er. Þetta er samstarfsverkefni okkar allra.
Góð leið er sjálfseignarstofnun með aðkomu ríkisstofnana, SÍ, SA, Fit og Bændasamtaka Íslands. Sú stofnun fengi landsvæði og húsakost á Reykjum afhent og annaðist allan daglegan rekstur með umhverfisráðuneytið fremst í flokki.

Þá er garðyrkjan meginhluti starfsins.

Hvað er garðyrkja?

Ræktun, skrúðgarðabygging, blóma­skreytingar, skógrækt og land­græðsla en einnig alls konar umhverfis­fræðsla. Skoðum þá hlið.

Í skólum menntum við skóla- og félagsliða, bætum við umhverfis­liðanámi.

Fræðsla um nærumhverfið verður að byrja í leikskólum og á að halda áfram upp í gegnum allt skólakerfið. Umhverfisliðanám færir okkur verðmæta starfskrafta og er í leiðinni aðfararnám inn í framhaldsnám t.d. í garðyrkju og alls konar framhaldsnám í tækni- og vísindagreinum.

Ungt fólk er ekki alltaf tilbúið að velja sér frekara nám. Það gæti tekið þennan grunn og haldið áfram að bæta við sig og endað jafnvel með háskólagráðu.

Við höfum dæmi um þetta í Bættu um betur. Fjölmargir sem hófu nám þar eru nú komnir með mikla menntun. Það fólk er mjög verðmætt inn í iðn- og tæknigreinar með mikla starfsreynslu í grunninn.

Hvað með húsakost?

Þær ríkisstofnanir sem tengjast þessu eru með starfsstöðvar um allt land. Sumar gætu að miklu leyti flutt sig að Reykjum, aðrar að hluta til.

Helstu kostir: Sameiginleg aðalskrifstofa, dreifing kennslu- og fræðsluefnis, sameiginlegt tölvuver, sameiginleg aðstaða fyrir ráðstefnur og fundi, athvarf fyrir fólk í framhaldsnám, rannsóknir og vísindaskrif. Athvarf fyrir alls konar námskeið og endurmenntun.

Hvað með kostnað?

Til er samanburður á kostnaði pr. nemanda í bók- eða verknámi í fjölbrautaskólum. Það eru fleiri í bóknámi en stefnan er jú að fjölga nemum í iðnnámi og gera það aðgengilegra, þar kemur Umhverfisliðaleiðin sterk inn. Fjölgun á þessu sviði lækkar kostnað á nemanda.

En húsakynnin?

HÍ fékk 5 til 6 milljarða króna til að kaupa Hótel Sögu. Landbúnaðar­háskóli Íslands fékk peninga til að kaupa Miðfossa. Hvað þurfum við marga milljarða til að byggja glæsilega aðstöðu að Reykjum?

Nýtt upphaf í sátt og samlyndi

Ágætu alþingismenn, takið á þessu. Það verður að nást sátt um Garðyrkjuskólann að Reykjum. Framkoma háskólaráðs er algjörlega ólíðandi og bein aðför að iðnnámi á Íslandi. Starfsfólk skólans býr við stöðugt einelti sem hefur jafnvel versnað með aðkomu eftir að mannauðsstjóri hóf störf. Hefjum Reyki til vegs og virðingar svo eftir verði tekið um allan heim.