Um helmingur bænda stundar vinnu utan bús

Rétt tæpur helmingur bænda innan Bændasamtaka Íslands, sem svöruðu könnun blaðsins, sækja vinnu utan bús eða 49%.

Í fjórum búgreinum sækir meira en helmingur svarenda vinnu utan bús, flestir í hópi geitfjárbænda eða 57%. Í hópi sauðfjárbænda vinna 54% utan bús, 53% hrossabænda og 51% skógarbænda.

Innan annarra búgreina var hlutfall þeirra sem vinna utan bús minna en fimmtíu prósent. Á meðal garðyrkjubænda og svínabænda sem svöruðu vinna samt fjörutíu prósent utan bús. Þó verður að hafa í huga að aðeins fimm svínabændur greiddu atkvæði.

Aðeins þrjú atkvæði bárust frá alifuglabændum en þeir sögðust allir vinna utan bús. Einungis eitt svar barst frá landeldisbændum og tvö frá loðdýrabændum.

Þetta er niðurstaða skoðanakönnunar Bændablaðsins meðal félagsmanna í Bændasamtökum Íslands en þeir eru um 2.600. Um 18% félagsmanna tóku þátt eða 482 talsins.  Könnunin stóð frá 17. – 24. Febrúar.