Ullarvörur og námskeiðahald
Ullarverið er nafn á nýrri verslun með ullartengdar vörur í verksmiðjuhúsnæði í Borgarási rétt við Flúðir í Hrunamannahreppi.
Þar er einnig verið að koma upp aðstöðu til að grunnvinna ull fyrir viðskiptavini og vinnuaðstöðu fyrir námskeiðahald og vinnustofur.
Eigendur Ullarversins eru Margrét Gunnarsdóttir á Ísabakka og Fjallaspuni ehf., sem er í eigu Elínar Jónu Traustadóttur í Tungufelli. Verslunin var opnuð laugardaginn 30. nóvember sl.
„Næsta verkefni er að að koma upp aðstöðu til námskeiðahalds tengdu ullarvinnslu, til dæmis námskeið í spuna, vefnaði, litun og þæfingu. Í þeirri aðstöðu verður einnig hægt að hafa vinnustofur þar sem fólk getur leigt sér tíma til að nýta aðstöðuna til sinnar vinnu tengt ullinni,“ segir Elín Jóna.
Nú er verið að vinna í öflun véla fyrir ullarvinnsluna sjálfa og er stefnt að því að Margrét og Elín Jóna geti unnið sína eigin ull í náinni framtíð í fyrirtæki sínu.
„Íslenska sauðkindin og ullin af henni er náttúrlega frábær og hefur bjargað lífi okkar Íslendinga í gegnum tíðina. Ullin hefur löngum verið vanmetin enda okkar mesta áskorun í framtíðinni er að ef sauðfé fækkar mikið meira í landinu en nú er, þá mun verða skortur á ull til vinnslu. Við erum spenntar að taka á móti gestum í Ullarverið og vonum að sem flestir sem eru á ferð um svæðið komi við að skoða aðstöðuna,“ segir Margrét.
