Tók á móti tveimur lömbum

Dagrún Dröfn býr á Króknum ásamt foreldrum sínum, Gunnari og Klöru, og systur sinni, Glódísi, 11 ára. Dagrún er mjög fjörug og skemmtileg stelpa sem hefur alltaf nóg að gera.

Henni finnst geggjað að fara á Gaukstaði á Skaga og Bólu í Blönduhlíð og brasa heilan helling þar. Enda fer sauðburðurinn hjá Fríðu frænku á Gauk að byrja. Hún tók á móti tveimur lömbum í fyrra og ætlar að taka á móti fleirum í ár. Í Bólu vilja þær byggja kofa í sumar, taka endalausa rúnta á krossaranum og fara að vaða og veiða.

Nafn: Dagrún Dröfn Gunnarsdóttir.

Aldur: Verð 10 ára, 9. júní nk.

Stjörnumerki: Tvíburi.

Búseta: Freyjugata 42 á Sauðárkróki.

Skóli: Árskóli.

Hvað finnst þér skemmtilegast í skólanum? Stærðfræði og útiíþróttir.

Hvert er uppáhaldsdýrið þitt? Hestur.

Uppáhaldsmatur: Svínakjötsneiðar með kartöflusalati.

Uppáhaldshljómsveit: Tiësto.

Uppáhaldskvikmynd: Matilda.

Fyrsta minning þín? Þegar vinkona mín fékk blóðnasir þegar við vorum 4 ára í leikskóla.

Æfir þú íþróttir eða spilarðu á hljóðfæri? Já, æfi fótbolta og körfubolta.

Hvað ætlar þú að verða þegar þú verður stór? Hárgreiðslukona eða vinna á Lemon.

Hvað er það klikkaðasta sem þú hefur gert? Prjóna með pabba á sleðanum hans.

Hvað gerðir þú skemmtilegt um páskana? Við spiluðum, fórum á sleða, út að renna, í heita pottinn og elduðum góðan mat.

Næst » Ég skora á Ísak Hrafn að svara næst.